Ausbléck: De nächste Reen kënnt an der nächster Nuecht

Héije Loftdrock huet erëm d’Haaptroll vum Wieder bei eis iwwerholl. Bis déi nächst Kalfront duerchzitt ass also mat entspriechend niddrëge Quantitéiten ze rechnen.

Just den ICON mat méi héije Quantitéiten

Den amerikanesche Wiedermodell GFS rechent am ganze mat tëscht 1 an 2 l/m², a Richtung héije Norden soll et tendenziell am naasste ginn. Den europäeschen ECMWF rechent mat 2 bis 4 l/m² an ass och der Meenung, dass et um nërdlechsten Zipfel vum Land am naasste gëtt.

De franséischen ARPEGE ass mat tëscht 1 a 4 l/m² dobäi a gesäit et vun der Verdeelung hier änlech wéi den ECMWF. Den däitschen ICON mécht dës Kéier e klenge Kontrast a berechent 6 bis 10 l/m². Den äusserste Weste soll de meeschte Reen/Nidderschlag ofkréien.

Di nächst Kalfront passéiert eis an der Nuecht op den Donneschden, eng zweet schonn um Donneschdenomëtten. E weidere Frontesystem ass schonn um Freide bei eis ënnerwee a passéiert eis an der Nuecht op de Samsden. Wärend dësen Zäite wäert et also och am warscheinlechste naass ginn.

D’Prognose fir déi nächst Deeg fannt Dir hei.