Direkt mol fir unzefänke, muss ech d’Wanterfans ënnert Iech enttäuschen. Den Trend, dee besot huet, dass Enn der Woch déi éischt Schnéiflacke méiglech sinn, konnt sech leider net duerchsetzen, och wann des Méiglechkeet nach bis virun e puer Deeg an de Modellkaarten ze gesi war. Wat awer bleift ass d’Chance, dass sech sou Probabilitéiten an de nächste Woche nach e puer mol kënnen erginn (virun allem, well mir dem Wanter jo ëmmer méi no kommen).
Mir gerode vun haut un rem lues a lues ënner Déifdrockafloss, wat ee virun allem de Weekend mierke wäert. Bis dohi bleiwen eis Temperaturen am Dag nach tëscht 8 an 12 Grad, woubäi d’Wolleke rem méi Präsenz weise wäerten. De Weekend selwer gesäit et aus dem aktuelle Standpunkt aus gesinn no ville Wolleken a Schaueren aus. D’Temperature klammen iwwerdeems rem op 14 Grad um Freiden, 16 Grad um Samsden a viraussiichtlech 14 Grad um Sonnden. D’Thema méigleche Frascht an de Nuechte, wéi mir et de Moment hunn, gëtt et och net méi wierklech.
