Ausland: Iwwerreschter vum Hurrikan DANIELLE ginn a Spuenien & Portugal erwaart

Nach ass d'DANIELLE en Hurrikan. An Zäit vun de nächsten Deeg wäert sech dat awer änneren. D'Iwwerreschter dovun zéien op Spuenien & Portugal duer.

Déi lescht Stonne vum Hurrikan DANIELLE

Den Hurrikan DANIELLE ass den éischten Hurrikan vun der Hurrikansaison – e spéide Start, well d’Saison geet all Joer den 1. Juni un. D’DANIELLE ass en Hurrikan vun der éischter Kategorie op der Saffir-Simpson Skala a generéiert Wandvitesse vun 130 km/h an der Moyenne. Nach bis muer de Mëtte soll sech näischt um Status vum Stuerm änneren, ier et dann en aussertropesche Stuerm gëtt – e verléiert also all d’Eegeschaften, déi een Tropestuerm opweist.


De weidere Parcours vum DANIELLE | Grafik: NWS / NOAA / hurricanes.gov

Als Ex-Hurrikan DANIELLE, mee eben a Form vun engem aussertropesche Stuerm, soll de Stuerm de NOAA-Projektioune no de Méinden tëscht Portugal a Spuenien u Land treffen. Dobäi sinn, nieft engem Batz Reen, nach Wandspëtzte vun tëscht 80 an 105 km/h méiglech.