De Moment schénge sech eng Partie vun de Lieser un de Küsten an der Belsch an och an Holland opzehalen a froe sech berechtegt, wat si a Saache Stuerm ze erwaarden hunn. Hei fannt Dir d’Äntfert dorop.
Däitlech méi intensiv wéi zu Lëtzebuerg
Wat vu vir eran schonn mol kloer ass: de Stuerm wäert op de genannte Plaze bei wäitem méi zolitt ausfale wéi zu Lëtzebuerg – dat gëllt fir d’Nuecht op den Donneschden mee och fir de Freiden.
Wa mir vum Stuerm schwätzen, deen d’Küsten an der Nuecht op den Donneschden iwwerrullt: den amerikanesche Wiedermodell GFS rechent Spëtzte vun tëscht 90 an 110 km/h. Eréischt um Donneschdemëtte soll lues awer sécher eng Berouegung agetruede sinn. Den europäeschen ECMWF ass mat engem Peak vu bis ëm 107 km/h dobäi, dat um Donneschdemoie fréi um Mëtternuecht. Anescht wéi de GFS, rechent den ECMWF eréischt um spéideren Donneschdenomëtte mat enger Wandberouegung.
De Stuerm um Freidenowend soll bei wäitem méi zolitt ausfalen. Lass geet et um Freidemëtte géint 12 Auer mat éischte Spëtzte vu bis zu 100 km/h. Tëscht 15 an 21 Auer soll de Maximum erreecht ginn, dat mat extremen Orkanstéiss vu bis zu 130 km/h. Den europäesche Modell ECMWF stëmmt deem zou a wëll esouguer 140 km/h an direkter Küstegéigend net ausschléissen. Fir komplett Kloerheet ze hunn, muss awer nach e bëssen Zäit vergoen. Mir schwätzen ëmmerhin vum Freiden, a mir hunn eréischt Dënschdenowend.
Och de Rescht vum Weekend soll stiermesch verlafen, zäitweis sinn och Stuermstéiss ze erwaarden. Intensitéite wéi un den Deeg virdru sollten dobäi awer keng méi optrieden.