Den héije Loftdrock, deen de Moment jo bei eis dominéiert, gëtt am Laf vum Weekend nëmme lues ëmmer méi aus westleche Richtunge gestéiert. Um Sonnde soll dann fir d’Woch ofzeschléissen eng Kalfront duerchzéien, dé fir méi groussflächege Reen an och staarke bis stiermesche Wand suerge kann.
Freiden, 13. November 2020
De Freidemoien ass den Himmel gréisstendeels zou, dat duerch Niwwelfelder. D’Temperature leien tëscht 5 an 8 Grad a klammen am Virmëtten op 8 bis 10 Grad erop. Et bleift éischter gro, d’Sonn huet keng all ze gutt Chancen. Mëttes an am Nomëtte si Maximaltemperature vun 11 bis 15 Grad ze erwaarden, de Wand bléist schwaach bis liicht spierbar aus Südwesten. An de Spëtzten ass e mat 30 km/h ënnerwee. Et geselle sech Nidderschléi dobäi, dat a Form vu Fisemreen a plazeweis och liichte Reeschaueren. Um Owend an an der Nuecht ginn d’Temperaturen op 10 bis 7 Grad zréck, et gëtt lues a lues manner naass a Form vu Reen, de Niwwel bleift awer viraussiichtlech bzw. e kënnt erëm.
