Wat bedeiten déi eenzel Warnstufen? A wéi vill ginn et der? Klickt hei.
Resumé 18. Juni 2021
Um Freiden zitt en Donnerwiederdéif mat sengem Kär vum westleche Frankräich a Richtung Nordséi. Virlafend vun der Kalfront vun dësem Déif läit eng Konvergenzzon iwwer Däitschland, un där sech am Laf vum Dag ëmmer erëm nei Schaueren an Donnerwieder entwéckle kënnen. Duerch d’Weiderverlagerung vum Donnerwiederdéif a Richtung Nordséi, wäert den Haaptrisiko vum Freidenomëtten un iwwer Deeler vum Nordweste vun Däitschland an Holland leien. Et besteet d’Gefor vu schwéiere Stuermstéiss, gréissere Knëppelsteng a Staarkreen. Och superzellulär Strukture sinn erëm méiglech.
Lëtzebuerg läit am ALGM / KLNG Gebitt. (Niveau 2 & 3 / 6).
Tornado Risk: 5 – 10 %.
(Location der Kaart enthuelen)
Fir d’lescht aktualiséiert:
18. Juni 2021 03:50 Auer
Oflaf
Um Freide verlagert sech en Donnerwiederdéif, wat mat sengem Kär iwwert dem Weste vu Frankräich läit, weiderhin a Richtung Norden a wäert am Laf vum spéideren Owend iwwert der Nordséi ukommen. Virlafend vun der Kalfront vun dësem Déif gëtt et eng Konvergenzzon, déi sech am westlechen Däitschland vu Karlsruhe bis an Deeler vu Nordrhein Westfalen eran erstreckt. Duerch d’Weiderverlagere vum Déifdrockkär ginn d’Kalfront & d’Konvergenzzon no a no méi wäit an de Norde gedréckt, besonnesch a Richtung Owend. Bei dësen atmosphäresche Bedingungen wiere besonnesch iwwert dem nordwestlechsten Däitschland resp. an Deeler vun Holland deels zolitt Entwécklunge méiglech.
Wat Lëtzebuerg betrefft, spille mir viraussiichtlech erëm méi um Rand mat. Wann et zu Donnerwieder kënnt, dann am warscheinlechste vum Nomëtten u bis an de fréien Owend eran. Duerno geet de Risk ëmmer méi wäit zréck, well mir aus Nordweste méi stabil Loftmassen zougespillt kréien. Dës ass net weider donnerwiederträchteg a wäert sech bis an de Samsden eran halen, ier et vum Samsdenowend un rëm interessant gëtt.
ERH
En erhéichte Risk (ERH) gëlt fir: de Nordweste vun Däitschland (Düsseldorf, Essen, Hamm, Münster, Bielefeld, paderborn, Hannover, Hildesheim, Bremen, an alles, wat nach méi wäit am Nordweste läit) a grouss Deeler vun Holland.
Vum spéideren Owend un gëtt an dësem Beräich mat iwwerlappende Parameter gerechent, déi Zenarien wéi lokal superzellulär Strukturen, Stuermstéiss, gréisser Knëppelsteng a Staarkreen erméiglechen géifen. Virun allem duerch déi lokal gutt ausgepräägt Wandscherung besteet haaptsächlech iwwert dem nërdlechsten Holland/nordwestlechsten Däitschland e klenge Risk vun engem Tornado-Event. Dozou ziele CAPE-Wäerter vun tëscht 1000 an 2000 J/kg, lokal esouguer liicht driwwer. Desweideren hu mir an der selwechter Géigend an enger Héicht vun 0-1 km Wandscherungswäerter vun tëscht 20 an 30 kn ze erwaarden, a Richtung Küstegéigend sinn och mol ëm 35 kn méiglech. Ënnerstrach gëtt dat dann op 0-6 km dann nach eng Kéier mat tëscht 20 a 40 kn. D’Opwandhelizitéit vun tëscht 150 an 200 m²/s² wäert en Deel zum klengen Tornado-Risk bäidroen.
Et besteet de Risk vun Donnerwieder mat stiermesche Wandstéiss bis hin zu Stuermstéiss (100 km/h), Knëppelsteng (2 bis 4 cm am Duerchmiesser) a Staarkreen (20-40 l/m²/1h).
W.e.g haalt am Hannerkapp, dass déi meescht Wiedere mat Staarkreen a stiermesche Wandstéiss erofgoe wäerten. Just punktuell begrenzt iwwerlappe sech d’Parameter tatsächlech, soudass et zu de restlech genannte Begleeterscheenunge komme kann.
KLNG
En klenge Risk (KLNG) gëlt fir: Deeler vun der Belsch (Antwerpen, Léck, Hasselt, …), de Westen, d’Mëtt an Deeler vum Norde vun Däitschland (Aachen, Solingen, Köln, Bonn, Siegen, Koblenz, Kassel, Göttingen, Brainschweig, Frankfurt am Main, Mannheim, Heidelberg, Karlsruhe, Kaiserslautern, Tréier, …) an den äusserste Nordoste vu Lëtzebuerg.
Den KLNG markéiert haaptsächlech dee Beräich, an deem d’Konvergenzzon hier Fanger am Spill huet. Am Verlaf vum Dag kënne sech an dësem Beräich eenzel Schaueren an Donnerwieder forméieren, déi awer just op lokaler Basis optriede wäerten. Nach laang net jiddereen an dësem Gebitt wäert also en Donnerwieder ze gesi kréien. Wann et awer dozou kënnt, da wier bei de kräftegen Zelle mat stiermesche Wandstéiss bis Stuermstéiss vun tëscht 70 a 90 km/h, Knëppelsteng a Staarkreen ze rechnen. Well d’Wandscherung an dëse Gebitter net grad esou ausgepräägt ass, läit den Tornadorisk iwwerall ënnert den definéierte 5%.
Wat elo Lëtzebuerg spezifesch betrëfft, ass folgendes: am Laf vum Dag kënne sech lokal mol Donnerwieder forméieren, mee d’Warscheinlechkeet ass och um Freiden tatsächlech net all ze grouss. Mir leien erëm méi um Rand vum Geschéie, soudass een zäitno muss matverfollege, wat d’Atmoshpär am Géigesaz zu de Modellrechnungen tatsächlech mécht. Eng groussflächeg Onwiederlag ass muer zu Lëtzebuerg net ze erwaarden.
ALGM
En allgemenge Risk (ALGM) gëlt fir: d’Südhallschent vun der Belsch, de Norden, Nordosten an Oste vu Frankräich, Deeler vun der Mëtt an de Südweste vun Däitschland, de Weste vun Eisträich, Liechtenstein, Schwäiz a Lëtzebuerg.
A fiichtwaarme Loftmasse kënnen eenzel Donnerwiederzelle net ausgeschloss ginn. D’Intensitéite sollte sech dobäi awer a Grenzen halen, dat bei Wandvitesse vun héchstens ëm 75 km/h, Knëppelsteng mat Kärgréisste vu bis ëm 1 cm am Duerchmiesser a punktuell Staarkreen. Nëmmen an Ausnamefäll kënnen dës Charakteristiken iwwertraff ginn a lokal och mol KLNG-Niveau erreecht ginn.
DWDR
En Donnerwiederrisk (DWDR) gëlt fir: D’Mëtt an de Nordweste vu Frankräich (Poitiers, Tours, Le Mans, Orléans, Pais, Amiens, Calais, Dunkerque, …), d’Nordséi, Deeler vum ëstleche Norde vun Däitschland (Magdeburg, Leipzig, Jena, Nürnberg, München, Augsburg, …) Deeler vun Eisträich (Salzburg, …). Et sinn e puer vereenzelt Donnerwieder méiglech, déi awer keng gréisser Opmierksamkeet néideg hunn.