Wat geschitt?
De Moment, Stand Sonnden 30. Januar 2022 16:47 Auer, läit dat verantwortlecht klengt Déif (Randdéif) iwwert de nërdleche britteschen Inselen a schafft sech an de nächste Stonnen iwwer d’Nordséi a Richtung Norddäitschland. Muer de Mëtte soll de Kär dann ukomm sinn, dat mat engem Drock vun 999 hPa. Südlech vun dësem Déif gëtt, wéi et ëmmer ass, d’Wand- resp. Stuermfeld matgedroen. Duerch d’Positioun vum Kär geréit och Lëtzebuerg dës Kéier an den Aflossberäich vun dësem Stuermfeld, wat also e puer méi ongemittlech Stonne fir eis bedeite wäert.
E weidere Parameter kënnt nach mat dobäi: de Schnéi. Dëst Déif zitt genee richteg, fir dass zäitgläich och méi wanterlech Zenarien optriede kënnen. Et gi nämlech net nëmme fiicht Loftmassen aus dem Nordosten ugezunn, mee duerch d’Stréimungsmuster vum Déif sinn dës och nach kal genuch. Tëscht dem Reen kann et um Méinden also am ganze Land zu eenzelne Flacke kommen, haaptsächlech op de Koppe kann do och “richtege” Schnéi dobäi sinn. Fir eis Automobilisten hu mir also zwee Punkten, op déi een e bësse méi oppasse sollt wéi soss: Wand & glat Stroossen duerch Schnéi.
