Bis de Mëttwoch sti mir nach ënner stabillem Héichdrockafloss, ier dat ganzt duerno lues awer sécher un d’Wackle kënnt. Bis et esouwäit ass, hu mir mat iwwerduerchschnëttlech héijen Temperaturen ze rechnen.
Lokal bis zu 35 Grad méiglech
Haaptsächlech elo an der éischter Wochenhallschent wäert et richteg waarm ginn. Um Méindemoie starte mir mat engem meeschtens kloeren Himmel an den Dag eran, just ganz lokal begrenzt ass eventuell mol e bësse Niwwel méiglech. No Wäerter, déi an de Moiesstonne gréisstendeels tëscht 10 a 16 Grad louche, ginn am Nomëtte Maximaltemperature vu 29 bis 33 Grad areecht. Laanscht Musel mee och a Géigende wéi Ettelbréck, Miersch oder Dikrech sollen déi héchst Temperaturen optrieden. Um Owend an an der Nuecht op den Dënschde ginn d’Temperaturen op 19 bis 12 Grad zréck, wat dann och ongeféier déi Wäerter wäerte si, mat deene mir an den Dënschden erastarten. Dagsiwwer presentéiert sech d’Wieder bal d’selwecht wéi um Méinden, et si just eventuell minimal méi Wolleken ënnerwee. Bei 31 bis 35 Grad bleift et awer dréchen.
