Virun allem vum fréie Nomëtte bis an de spéidere Nomëtten era rechent den europäesche Wiedermodell mat stiermesche Wandstéiss vu ronderëm 70 km/h an eisem Land. Den amerikanesche Wiedermodell GFS rechent bei eis mat knapp 80 km/h, iwwert der Grenz soll dëse Wäert iwwertraff ginn. Och den däitschen ICON-Modell gëtt am Nomëtte Signaler fir Stuermstéiss am Beräich vun den 80 km/h.
Zousätzlech hu mir et mat engem klengen Donnerwiederrisk ze dinn. D’Haaptgeschéie spillt sech zwar knapp südlech vun eis of – an awer ka net ausgeschloss ginn, dass sech mol eng Zell bis heihin “veriiert”. Sollt et dozou kommen, da géif dat an dësem spezifesche Beräich de Risk vu warnrelevante Stuermstéiss definitiv an d’Luucht drécken.
De Fazit ass also den, dass et muer mol sécher lefteg bis stiermesch gëtt, punktuell och mol warnrelevant (erreeche vun der Warnschwell vu mindestens 75 km/h). E klengen Donnerwiederrisk besteet och, mee dat ass keng Garantie, dass et och wierklech dozou kënnt. Déi héchst Warscheinlechkeet besteet am direkten Ausland.
De Wand verschwënnt net
Och fir en Dënschde ginn et déi eng oder aner Modeller, déi erëm Stuermstéiss berechnen. Well d’Modeller sech ënnerteneen awer nach guer net eenz sinn, kënnt den Update dozou eng aner Kéier.