D’Donnéeë vum Radar vum däitsche Wiederdéngscht DWD, deen zu Neuheilenbach an der Äifel steet, huet zanter dem Ufank vum Mount Reequantitéite vun tëscht 40 a bal 100 l/m² gemooss. Den dréchensten Eck war de Raum tëscht Hëpperdang, Näidsen an Heesdref, tëscht 37 a 40 l/m² waren et hei op den dréchenste Plazen. Soss geet d’Schéier un der nërdlechster Spëtzt vun 40 bis 55 l/m². De meeschte Reen hate mir an dësem Mount an enger Sträif vun Ell bis erof an de Raum Réiden, déi héchst Wäerter leien tëscht 70 a 98 l/m². Méi wäit südlech hu mir eng änlech Sträif, déi sech vun der Felleschmillen (nërdlech vun Äischen) bis eriwwer op Simmerfarm zitt. E Beräich, deen och un dës Wäerter erukënnt, ass nach Schëndels bis erof op Ernster bei Nidderanven.

Kucke mir eis dann nach verschidde Wiederstatiounen un, da gesi mir, dass mir un der ASTA-Statioun zu Räichel alleng zanter dem Sonndenomëtten 15 Auer 50,1 l/m² Reen haten, wat eng uerdentlech Hausnummer ass. Un der Météo Boulaide-Statioun zu Baschelt waren et zanter dem Ufank vum Mount, bis elo, 79 l/m² Reen. Um Hareler Poteau weist sech eng Differenz, 63 l/m² waren et bis elo do. An der Gemeng Bauschelt reent et duerchschnëttlech 49,1 l/m² an engem Juli – also si mir dëse Mount, op d’mannst wat d’Gemeng ugeet, iwwert dem Soll ukomm.

En anere Bléckwénkel

Op déi lescht 10 Joer bezunn huet et an der Gemeng Bauschelt bis de Juli inclus schonn duerchschnëttlech 377,5 l/m² gereent. Un eiser Referenzstatioun zu Baschelt beleeft sech déi aktuell Joreszomm op 489,2 l/m², wat schonn däitlech driwwer läit.

Déi akkumuléiert méintlech Reenzommen un eiser Statioun zu Baschelt, verglach mat 2024 an der Moyenne vun 2012-2022 | Grafik: Météo Boulaide

Dass dat awer net iwwerall esou ass, weisen d’Donnéeë vu Réimech: De private Wiederdéngscht Météo Réimech, mat dem mir am reegelméissegen Austausch stinn, huet d’Donnéeën analyséiert an ass op d’Konklusioun komm, dass zu Réimech nach 43 l/m² feele, fir de méintlechen Defizit vum Juli 2025 auszegläichen. E Joresdefizit besteet och, do feele nach 196 l/m².

Et reent net un engem Stéck

Et ass richteg, dass et dëse Mount an och op d’Joer 2025 gekuckt ze vill gereent huet, plazeweis. Allerdéngs huet et an dësem Summer zu kengem Zäitpunkt un engem Stéck gereent, héchstens elo momentan. Dëst spigelt sech och ganz däitlech op dëser Grafik erëm: Se weist den akkumuléierte Reen un eiser Statioun um Hareler Poteau, gekoppelt mam Temperaturverlaf.

Déi akkumuléiert Reenzommen & den Temperaturverlaf zanter dem meteorlogesche Summerufank 2025, gemooss un der Météo Boulaide-Statioun um Hareler Poteau

Mir erkennen, dass mir dotëscht ëmmer erëm mol méi a mol manner laang Pause vum Reen haten. Dass et sech dobäi parallel ëmt waarm Summerphase gehandelt huet, ënnersträicht den Temperaturverlaf. Schéin ze erkennen ass och, dass et no all Wiermt- oder Hëtzt-Peak zu enger Kalfront mat Schaueren an och mol Donnerwiederen koum. Dës naass Phasen hu ni laang gedauert, ier d’Summerwieder zréckkomm ass. Déi eenzeg Phas, an där et méi laang um Stéck ëmmer erëm zu Schauere kënnt, erliewe mir elo eréischt zanter dem Ufank vum leschte Weekend.

D’Reenzomme si schéin a gutt, mee et muss een och nach berécksiichtegen, dass nach laang net alles vum Reen och wierklech vun der Natur ka benotzt ginn: Duerch déi sonneg a waarm Phasen ass e gréisseren Deel dovu verdonscht. Dat erkläert ënnert anerem, firwat eng Partie Landstrécher brong amplaz gréng sinn – trotz de gemoossene Reequantitéiten.

2025 (bis elo) vs. 2024

Fir et ofzeronne, kucke mir nach eng Kéier op d’Radardonnéeën zréck: Op d’Joer 2025 gekuckt leien d’Reenzommen am ganze Land verdeelt bis ewell tëscht 250 a 511 l/m². Déi dréchenst Plazen hu mir am Raum Iechternach, Réimech, Fréiseng, Mamer, Géigend Biissen, Esch-Sauer, Wëlwerwolz bis op Hëpperdang. Déi héchst Zommen (iwwerduerchschnëttlech) hu mir un der belscher Grenz bei Pärel an Holz mat >500 l/m². Tëscht der Haaptstad, Conter, Nidderanven, Eesebur, Schous, Miedernach, Bivels, Houschter-Déckt, Géidgen, Biekerech, Nidderkuer an Esch-Uelzecht war et a ville Fäll mat ëm 400 l/m² a liicht driwwer ëmmer nach meeschtens ënnerduerchschnëttlech naass, baséierend op der Referenzstatioun vum staatleche Wiederdéngscht um Findel (Referenzperiod 1991-2020). Dëser Statioun no huet et an dëser Period bis de siwente Mount inclus duerchschnëttlech schonn 455,4 l/m² gereent.

Kuerze Verglach mam leschte Joer 2024: Deemools hate mir bis den 22. Juli schonn tëscht 500 a knapp 740 l/m² Reen, just an engem klenge Beräich tëscht Iewerleng, Biekerech a Schëndels waren et knapp ënner 600 l/m² – d’selwecht am Raum Konsduerf, Wecker, Mertert a Bur. Deemools ware mir zu dësem Zäitpunkt also iwwerall am Land schonn iwwert dem järlechen Duerchschnëtt (bis op dësen Datum bezunn) ukomm – an domat war et d’lescht Joer och däitlech méi naass wéi et dëst Joer bis elo ass.

Wat d’Gesamtzomme betrëfft, an och déi räimlech Verdeelung vun dësen, gläicht d’Joer 2025 e bëssen dem Joer 2023.

De Fazit

De Juli 2025 war bis ewell plazeweis iwwerduerchschnëttlech naass, mee bei wäitem net iwwerall. Zumools am Westen, Nordwesten an och iwwert dem zentral geleeëne Land huet et bis elo am meeschte gereent. Iwwerdeems hunn déi äusserst Nordspëtzt, den Osten an och de Raum westlech vun der Haaptstad am mannste Reen ofkritt – do si mir ënnerduerchschnëttlech ënnerwee.

Obwuel et zanter dem meteorologesche Summerufank den 1. Juni ville subjektive Meenunge no vill gereent huet, kënne mir festhalen, dass et net permanent um “schiffe” war, mee a gréisseren Intervallen. Wann et mol gereent huet, da waren dat lokal gréisser Zommen – mee duerch d’Wiermt an déi vill Sonnestonne wärend de laange Ree-Pausen ass villes dovu verdonscht, d’Natur hat net esouvill dovun. Dovun ofgesinn kënnt et, wéi am Artikel beschriwwe, vu Plaz zu Plaz zu gréisseren Ënnerscheeder, an domat och zu Defiziter.

Insgesamt verleeft d’Joer 2025 bis elo däitlech méi dréche wéi d’Joer 2024, an dat iwwerall.

Flimmerkëscht