Verbreet Wandvitesse vun iwwer 100 km/h
Den Orkan KYRILL ass deemools vum Atlantik hier komm an ass dunn mat sengem Kär iwwert de Norde vun England & d’Nordséi eriwwer a Richtung Ostséi virugezunn. Mat dobäi war e groussflächegt Stuermfeld, wat virun allem an Däitschland fir grousse Schued gesuergt huet. Et war déi éischt Kéier an der Geschicht vun der Republik, dass de Schinneverkéier huet missen agestallt ginn. A ganz Europa si 40 Mënschen duerch de Stuerm ëm d’Liewe komm, alleng an Däitschland waren et 13 Persounen.
Zu Lëtzebuerg ass un dësem Dag och signifikante Schued ugeriicht ginn, allerdéngs a ganz aneren Dimensioune wéi an Däitschland – eis Noperen huet et nämlech vill méi uerg getraff. Déi héchst Wandvitesse konnten deemools un der (dunn nach) Meteomedia-Statioun zu Ëlwen mat 115 km/h gemooss ginn, direkt hannendrun war d’Statioun Beetebuerg-Obeler mat 113 km/h. Un den anere Statioune louchen d’Wandspëtzte wärend enger laanger Zäit, vum fréien Donneschdemoien un bis an de Freidenomëtten eran, am stiermesche- bis hin zu Stuermberäich, op de Koppe waren tëscht 70 an 110 km/h dobäi keng Raritéit.
Iwwerdeems huet et och gutt gereent; zu Ettelbréck waren an Zäit vu 24 Stonnen knapp iwwer 40 l/m² Waasser vum Himmel komm. Mir hunn definitiv schonn méi markant Zuele gesinn, mee a Kombinatioun mam zolitte Wand waren et fir dat ganzt Land definitiv onroueg 24 Stonnen.
Däitschland: Wandvitesse vun 140 km/h an driwwer
An Däitschland louchen déi héchst Wandvitessen deen Dag verbreet tëscht 90 an 130 km/h. Um Fluchhafen zu Düsseldorf ass en Orkanstouss vun 145 km/h gemooss ginn, wat fir d’Flaachland eng uerdentlech Hausnummer ass. Et gëtt vermutt, dass beim Kalfrontduerchgang op méi Plazen 140 km/h erreecht oder bei wäitem iwwertraff goufen – de Schued war nämlech deels enorm. E weidere beandrockenden Orkanstouss war am Weinbiet op 553 Meter mat 163 km/h gemooss ginn.
Déi allerhéchst Vitesse si natierlech op de Bierger virkomm. De Brocken (1133 m) war mat 199 km/h dobäi, d’Wasserkuppe (921 m) mat 172 km/h, de Fichtelberg (1213 m) mat 183 km/h, de Feldberg am Schwarzwald (1489 m) mat 166 km/h, de Großer Arber (1436 m) mat 168 km/h, den Hohenpeißenberg (977 m) mat 162 km/h, d’Zugspitze (2964 m) mat 177 km/h an de Wendelstein (1832 m) mat 203 km/h.