Keng gutt Aussiichten
An de leschte Wochen ass ëmmer erëm iwwer zolitt Wiederphänomener am Mëttelmierraum beriicht ginn. Fir déi nächst Zäit sinn d’Aussiichte weiderhi net all ze gutt: duerch ëmmer nach héich Wasseruewerflächentemperaturen, Déifdrockafloss & méi kill Loftmassen an der Héicht ginn ëmmer erëm Schlechtwiedergebitter ausgeléist, déi fir schwéiere Schued suerge kënnen. Schonn am Summer haat een dës Entwécklungen fir am Hierscht virausgesot a gefaart.
Fir déi nächst Serie gesinn d’Modeller fir d’éischt mol e kräftegt Reegebitt fir Südwestfrankräich a Nordostspuenien vir: bis de Sonnden inclus sollen do nämlech lokal tëscht 50 an 80 l/m² Reen falen. Och a Richtung Marseille esouwéi d’Westküst vun der Nordhallschent vun Italien & Corse kënnen änlech Quantitéiten zesummekommen.
Kroatien méiglecherweis erëm betraff
Vun der nächster Woch un sinn dann och erëm vu Kroatien aus bis ganz erof bis a Griicheland op ee Neits zolitt Reefäll ze erwaarden. Déi aktuell Modellrechnunge vum europäesche Wiedermodell ECMWF gesinn bis den Dënschden inclus Quantitéite vun tëscht 70 an 150 l/m², punktuell och erëm 200 l/m² an driwwer.
Parallel dozou reent et och iwwer Italien virun: südlech vu Roum ginn och erëm bis ëm 200 l/m² berechent. Wéi et genee kënnt, muss awer an de nächsten Deeg ofgewaart ginn. De Risk vu schwéieren Onwieder ass awer op alle Fall present.