SkyWatch

ALLGEMENG SITUATIOUN: E Mëttwochmëtten installéiert sech eng Konvergenzzon/"Tiefdruckrinne" vum zentrale Frankräich iwwert den Oste vun der Belsch bis an de nordweste vun Däitschland eran - dat am Virfeld vun enger Kalfront, déi eis aus westleche Richtunge méi no réckt. Dëst bréngt en enormen Temperaturgradient mat sech (bis zu 40°C am Waarmsektor, op der Récksäit op eemol just nach 20° oder drënner), wat just mat Wand kann ausgeglach ginn. Bis op e puer wéineg Géigenden iwwert dem Kontinent, wäert och de Wand an de meeschte Fäll kënnen d'Haaptroll spillen - an dat net nëmmen an de Gebitter mam héchste Niveau. Iwwerleet Iech also elo schonn, Äer Gaardemiwwele rechtzäiteg eranzehuelen. Prabbelien, Pavillonen, Sprangschläss, etc. kënnen heiduerch och fléie léieren. ERHEICHTE RISK: En ERHEICHTE RISK zitt sech vum zentrale Frankräich (Raum Troyes) iwwer Reims bis an den Oste vun der Belsch, iwwert déi südëstlech an ëstlech Deeler vun Holland esouwéi och groussen Deeler vu Nordrhein-Westfalen bis a Niedersachsen eran. Dëst ass och méi oder manner de Beräich, wou déi virlafend Konvergenzzon wäert leien. A genee hei kommen e ganze Koup Zutaten zesummen, déi zolidd Donnerwieder bis an den Onwiederberäich kënne produzéieren. Vun der Energie hier, ass mat Wäerter vun tëscht 1000 an deels och mol 2500 J/kg ze rechnen. Dëst iwwerlappt sech mat PPW (Precipitable Water) vun 20 - 40, deels esouguer 50 mm. Zur selwechter Zäit hëlt vu Nordwesten hier och d'Wandscherung zou, also d'Ännerung vun der Wandgeschwindegkeet mat der Héicht: Op den ënneschte 0 - 1 Kilometer gëtt mat 20 bis 40 kt gerechent, mee och d'Richtungsännerung ka besonnesch wärend der Entstéiungsphas vun den Zellen mol dofir suergen, dass se superzellulär ginn. Knëppelsteng mat Gréisste vun tëscht 2 a 4 cm, fläit och mol lokal 5, si wärend enger kuerzer Zäitfënster méiglech. Wat awer virun allem op sech opmierksam mécht, ass de sougenannten DCAPE, also Downdraft CAPE: Dëse läit de Berechnunge no an dësem markéierte Gebitt grouussflächeg bei ëm 1000 J/kg an driwwer, wat e kloren Indice fir Micro- oder Downbursts ass. Dobäi fällt de Reen wéi e grousse naasse Sak aus dem Himmel a killt seng ronderëmleiend Loft och mat immenser Vitesse of, esoudass och grouss Wandgeschwindegkeeten entstinn. Kommen dës um Buedem un, da breet sech de Wand, wéi bei engem Loftballon mat Waasser, an all Richtungen aus. Aus direkte Modell-Outputs an och Analysen geet ervir, dass et am Worst Case (!) zu orkanaartege Wandstéiss bis hin zu Orkan vun tëscht 105 an 125 km/h ka kommen. Do, wou et net grad esou ass, ass éischter de Beräich vun tëscht 80 an 110 km/h unzefannen. KLENGE RISK: E KLENGE RISK gouf fir d'Ëmgéigenden vum ERHEICHTE RISK erausginn, dorënner leie weider Deeler vu Nord- a Nordostfrankräich, der Belsch, Holland, West- a Norddäitschland an och Lëtzebuerg. D'Donnerwieder aus dem ERH-Beräich beweege sech viraussiichtlech séier an de KLNG-RISK eran, wou d'Potenzial vu gréissere Knëppelsteng lues a lues sollt ofhuelen. Zousätzlech hunn d'Modeller fir dës Beräicher net méi grad esou héich Wandvitessen an hirem Output, och wann dat elo keen Ausschlosskriterium ass. Wichteg ass och ze wëssen, dass et sech jo egal wéi ëmt eng Front handelt, déi d'Gebitt passéiert: Wéi héich d'Wandvitessen ausfalen wäert och vill domat ze dinn hunn, wou Schauer- an Donnerwiederzellen entstinn a wéi staark dës sinn. Ausserhalb vun den Zelle kann deemno wéi schonn mat bis zu 50 - 70 km/h gerechent ginn, mee ënnert esou enger Zell/engem Segment kann et op tëscht 75 a 90 km/h eropgoen. De Worst Case wier tëscht 105 an 110 km/h, den DCAPE gëtt och an eise Regiounen mat deels iwwer 1000 J/kg als héich bewäert. Un de Reen sief och weiderhi geduecht: Punktuelle Staarkreen ass méiglech, deen bei den am ERH-Gebitt genannte PPW-Wäerter (20-40, deels 50 mm) och mol dofir suerge kéint, dass et zu Iwwerschwemmunge kënnt. Wichteg: Dësen Text bezitt sech net explizit op Lëtzebuerg, mee dat ganzt KLENGE RISK-Gebitt. Ofgesi vun allem kann et och schonn méi fréi am Nomëtten zu PUNKTUELLEN Hëtztdimmere kommen. ALLGEMENGE RISK: En ALLGEMENGE RISK gëllt ronderëmt de KLENGE RISK: Op der westlecher Säit markéiert et d'Grenz zu de britteschen Inselen & der Nordséi, iwwerdeems et op der nordëstlecher Säit dat theoretescht "Auslafbecken" weist vun de Wiederen, déi vum ERH & KLNG kënnen an den ALGM eriwwerzéien. A Richtung Bayern an och Alpen ass de Risk besonnesch do, fir eenzel Hëtztdonnerwiederen auszedrécken, ënnert deenen et kann zu stiermesche Wandstéiss (deels Stuermstéiss) an och klenge Knëppelsteng esouwéi quasi-stationäre Staarkreen kommen. Och do besteet e klengen Iwwerschwemmungsrisk.