Situatioun
Iwwerdeems gëschter nach haaptsächlech domat gerechent gouf, dass mir et och am Ufank vun der nächster Woch mat stabilem Héichdrockafloss ze dinn hunn, gesäit dat ganzt an Tëschenzäit schonn erëm bëssen anescht aus. Dëst ass awer och e gutt Beispill dofir, wéi variabel d’Modellrechnungen de Moment sinn. Et sollt een déi nächst Zeilen dowéinst mol nach mat Virsiicht genéissen.
D’Situatioun ass déi, dass eisen Héichdrockafloss méi oder manner aus nërdleche Richtungen hier kann “agequetscht” ginn – dat duerch en Déifausleefer, dee vun Dänemark hier mat sengem Kär a Richtung Däitschland/Polen virunzitt. Hannendrun bréngt dësen Déifausleefer e Schwall u polare Loftmassen aus dem héije Norde bei eis, wouduerch déi “gewënscht” Nordweststréimung kuerzzäiteg zustane kéim. Dës ass nämlech a ville Fäll dofir néideg, dass et tatsächlech schneie kann. Fiicht, mee och kal genuch Loftmasse kommen esou zesummen. Haaptsächlech betraff ass viraussiichtlech den Osten, d’Mëtt an de Süde vun Däitschland. Do kann et deelweis bis méi wäit erof wäiss ginn. A bei eis?
Wéi den aktuellen amerikanesche Wiedermodell GFS et gesäit (Run: Freiden, 27. Nov. 2020 12Z), soll de Virstouss vu fiichten a polare Loftmassen an der spéiderer Nuecht op den Dënschde bei eis ukommen. De Modell huet fir Lëtzebuerg keng konkret Schnéisignaler dran, mee wann ee sech d’Loftmassen ukuckt an den Zäitpunkt, un deem de Nidderschlag méiglech ass, dann ass et méiglech, dass déi allerhéchst Koppe vum Land op mannst Schnéireen ze gesi kréien.
Den aktuellen ECMWF rechent schonn um méi fréie Méindenowend mat der Front aus Nordwesten. Dobäi soll et am Ufank nach reenen, mee wat méi kill Loftmassen eragefloss komme, wat am Laf vum Owend a vun der Nuecht d’Warscheinlechkeet vu Schnéireen an d’Luucht geet. Um Buedem ass et viraussiichtlech zimmlech kill, doduerch kann deen Szenario zustane kommen, dass de Nidderschlag aus kille Loftmassen erof a waarm Loftmasse fält an dann kuerz ier en hei ënne bei eis ukënnt erëm a kal Loftmassen. Doduerch besteet de Risk vu Glëtz.
Den däitschen ICON ass där Meenung, dass d’Front um spéide Méindenowend bei eis ukënnt a rechent deelweis bis an déi méi déif Lagen mat den éischte Schnéiflacke fir d’Saison. Och dobäi ass awer d’Warscheinlechkeet vu Glëtz an/oder Schnéireen. Am warscheinlechste sinn d’Flacken op de Koppen op ëm 420 Meter an driwwer.
Den ARPEGE bréngt eis de Moment déi optimisteschst Berechnung. Dësem Modell no soll et vum spéidere Méindenowend un bis bal ganz erof wäiss ginn, dat mat Quantitéite vun tëscht 1 an 3 cm. Wéi gesot, sinn dës Wäerter awer nach mat grousser Virsiicht ze genéissen.