Haut hu mir en Déifdrockkomplex iwwert de britteschen Insele leien, deen iwwert dem westleche Frankräich e weidert klengt Déif ausbild, wat dohannen dann och am Laf vum Owend bis an d’Nuecht era fir deels schwéier Donnerwiedere suergt. Gréisser Knëppelsteng, Stuerm a virun allem Staarkreen sinn en Thema. Dëst Déif zitt duerno op d’Nordséi eraus a schwächt sech of. Zu Lëtzebuerg besteet am spéidere Nomëtten an och um Owend e minimale Risk vun engem lokalen Hëtzt-Donnerwieder – et soll ee sech awer net drop festleeën, well et, wéi gesot, net all ze warscheinlech ass.

D’Grousswiederlag fir de Samschdemëtten | Grafik: Deutscher Wetterdienst (DWD), Edit: Météo Boulaide

Fir e Samschde bleift eis den Déifdrockkomplex awer erhalen, deen lues a lues ufänkt, eng Kalfront vum Mier hier an eis Géigenden ze drécken – dës wäert eis awer eréischt an der Nuecht op e Sonnden/e Sonnde fréi passéieren. Vu gréisserer Relevanz ass eng sougenannt “Konvergenzlinn”, déi sech am Virfeld vun dëser Kalfront forméiert. Dës soll sech dann vu Nordfrankräich aus iwwer BeNeLux bis an de Weste vun Däitschland erstrecken – se sinn dofir bekannt, dass de Wand aus ënnerschiddleche Richtungen openeentrëfft an doduerch d’Loftmass dozou beweegen, sech ze hiewen. D’Resultat wiere Schaueren an Donnerwiederen – eigentlech.

Et kënnt en “Deckel” an d’Spill

Eppes, wat mir rar ernimmen, ass e sougenannten “Deckel” an der Atmosphär. Engersäits hu mir déi potenziell Energie, déi fir d’Bildung vun Donnerwiederen zur Verfüügung steet (och nach CAPE genannt). Anerersäits hu mir awer och nach de Géigendeel dovun, nämlech déi sougenannt “Konvektiounshemmung”, och nach CIN genannt. Ass den CIN ze staark, da gëtt d’Bildung vun Donnerwiederzellen ënnerdréckt. Ënnert dem Deckel versteet een also eng waarm an dréche Loftschicht, déi déi potent fiichtwaarm Loft dorun hënnert, héich an den Himmel virunzekommen. Et kann ee sech dohier esou virstellen wéi an engem Dëppen mat engem Deckel, ënnert dem sech immens vill Damp usammelt – e kann awer, eben duerch den Deckel, net eraus an d’Kiche selwer entwäichen. Et géif een jo elo soen, dass d’Hiewung duerch déi Konvergenzlinn e valabelen “Trigger” fir d’Duerchbrieche wier, mee d’Modeller bewäerten et awer éischter zréckhalend bis pessimistesch. Mat dobäi kënnt och nach, dass et virleefeg vun dëser Linn zu engem méi strammen an dréchenen Ostwand kënnt, deen d’Entwécklung vun Zelle net onbedingt ukuerwelt.

D’Modeller weise keng eendeiteg Donnerwieder-Signaler fir de Nomëtten. Mee wann iergendwou den Deckel brécht, kann et punktuell séier goen | Grafik: modellzentrale.de

Mee net falsch verstoen: De Risk ass doduerch net fort. Do, wou den Deckel dann awer sollt duerchgebrach ginn, kann et mat rasanter Vitesse zu zolitten Entwécklunge kommen, zumools a Saache Staarkreen. Momentan ass d’Iddi also déi, dass et dagsiwwer haaptsächlech duerch dëse Prozess mol kann zu isoléierte méi kräftegen Entwécklunge kommen. Isoléiert: Dat heescht, dass et déi allermannst betrëfft, mee et vereenzelt Géigenden, vu Nordfrankräich aus iwwer BeNeLux bis Westdäitschland, erwëscht.

Zweet Phas an der Nuecht

An der Nuecht sollt eis d’Konvergenzlinn schonn passéiert hunn – hannendrun ass et also dann net méi wäit, bis och d’Kalfront eis méi no kënnt. Spéitstens un hir schloen däitlech méi Modeller aus a berechnen engersäits iwwert dem Nordweste vun Däitschland e potenziellen Donnerwiedersystem, anerersäits ginn et awer och Signaler fir de Nordoste vu Frankräich, Baden-Württemberg a Saarland. Ob sech och dotëscht eppes entwéckelt, wat dann och gréisser Deeler vun eisem Land (oder och dat ganzt) erwëscht, bleift ofzewaarden. D’Potenzial ass awer allefalls do a weiderhi géif de Staarkreen am Fokus stoen. Well mir do der Kalfront schonn méi no leien, ass d’Potenzial fir stiermesch Wandstéiss bis hin zu Stuermstéiss schonn e gudden Tick méi héich wéi et nach dagsiwwer de Fall war.

Momentan Iddi vum europäesche Modell fir d’Nuecht op e Sonnden, den amerikanesche Modell huet eng änlech Iddi | Grafik: wxcharts.com

Och wann ee keng typesch “Jo a Nee-Äntfert” ka ginn, soll een den Donnerwiederrisk muer am Hannerkapp halen. Sollt Dir eppes dobausse plangen, dann halt de Radar an den Himmel am Aen an hutt beschtefalls eng Alternativ prett, op déi Dir bequem kënnt zréckgräifen.

D'Météo fir Lëtzebuerg. Präzis an aktuell.

Sech Informéieren

Mëttelfrist-Update: E klengt Déif suergt fir Komplikatiounen

Bilan: De Juni 2025 war däitlech ze waarm

De Wochenausbléck: D’Temperature schaffe sech lues a lues erop

Flimmerkëscht

Summer PUR! DONNERWIEDEREN fir de Virowend?

De Juni gëtt VOLLGAS, nei HËTZT an Aussiicht!