Mir geheien elo bewosst e Bléck an den Ultra-Spekulatiounsberäich, déi europäesch an amerikanesch Laangzäitmodeller hëllefen eis dobäi. Wéi kéint de Rescht vum Summer verlafen?

Virwuert

Den Text an dësem Artikel bezitt sech bewosst op de sougenannten Ultra-Spekulatiounsberäich. Mir bezéien eis op déi momentan Berechnunge vum europäeschen an amerikanesche Laangzäitmodell. Et ass domat also keng Prognos, mee just eng Estimatioun. Well dës awer ëmmer erëm als “Wegweiser” kënnen déngen, kann e Bléck an d’Glaskugel duerchaus interessant sinn.

Mir schwätzen hei haaptsächlech vun Anomalien – also ëm wéivill Grad verschidde Moyenne kéinten ënner- oder iwwertraff ginn. Spezifesch Aussoen iwwer absolut Minimal- a Maximaltemperature kënne net getraff ginn, dat ass onméiglech.

De Rescht vum Juli

An engem Juli gëtt zu Lëtzebuerg eng offiziell Duerchschnëttstemperatur vun 18,7°C gemooss, baséierend op der Referenzperiod vu 1991-2020. Iwwerdeems kommen an der Moyenne 72,1 l/m² Reen erof.

Fänke mir mat de Berechnunge vun den Amerikaner un. Fir de Juli rechent dësen am Allgemengen, dass de Mount am Endeffekt tëscht 1 an 2 Grad ze waarm soll ausfalen – de laangjäregen Duerchschnëtt also ëm dës Differenz kéint iwwertreffen.

D’Laangzäitberechnungen a Saachen Temperaturanomalie fir de Juli laut CFS-Modell | Grafik: cpc.ncep.noaa.gov

Zur selwechter Zäit ass de Modell der Meenung, dass de Mount vill ze dréche soll op en Enn goen, dat mat engem Defizit vu gutt -0,8 bis -1 l/m² den Dag.

D’Laangzäitberechnungen a Saache Nidderschlagsanomalie fir de Juli laut CFS-Modell | Grafik: cpc.ncep.noaa.gov

Den europäesche Laangzäitmodell gesäit fir de momentan lafende Mount eng potenziell Anomalie vu bis zu +3 Grad, wat wierklech zolidd wier.

D’Laangzäitberechnungen a Saachen Temperaturanomalie fir de Juli laut EFFIS | Grafik: forest-fire.emergency.copernicus.eu/

Änlech wéi den amerikaneschen CFS-Modell kéinten eis um Schluss vum Mount tëscht 25 a 40 l/m² feelen.

D’Laangzäitberechnungen a Saache Nidderschlagsanomalie fir de Juli laut EFFIS | Grafik: forest-fire.emergency.copernicus.eu/

Wéi et am August kéint virugoen

Als Normalwäert gëllt fir den August eng Temperaturmoyenne vun 18,4°C, iwwerdeems et 71,9 l/m² reent – baséierend op der Referenzperiod vu 1991-2020.

De Bléck an déi amerikanesch Glaskugel verréit, dass och den August en ze waarme Mount soll ginn. Sou als Randnotiz: Dass e Mount iwwerduerchschnëttlech waarm ausfält, ass an Tëschenzäit keng Raritéit méi – et ass scho bal déi nei Norm. Dës Kéier gëtt eng positiv Anomalie vu bis zu 1 Grad berechent.

D’Laangzäitberechnungen a Saachen Temperaturanomalie fir den August laut CFS-Modell | Grafik: cpc.ncep.noaa.gov

Parallel dozou ginn “iwwerraschenderweis” keng gréisser Opfällegkeeten a Saache Reen simuléiert, Stand elo. Mir kéime méi oder manner beim laangjäregen Duerchschnëtt eraus.

D’Laangzäitberechnungen a Saache Nidderschlagsanomalie fir den August laut CFS-Modell | Grafik: cpc.ncep.noaa.gov

Den europäesche Modell hält u sengem Trend aus dem Juli fest a gesäit och fir den August eng markant positiv Anomalie vun 2 Grad, an dat iwwer gréisseren Deeler vu West- a Mëtteleuropa.

D’Laangzäitberechnungen a Saachen Temperaturanomalie fir den August laut EFFIS | Grafik: forest-fire.emergency.copernicus.eu/

De Reen kéint dann och ëmmer nach ënnerduerchschnëttlech ausfalen, ëm 15 l/m² sollen eis duerchschnëttlech iwwert d’Land verdeelt kënne feelen.

D’Laangzäitberechnungen a Saache Nidderschlagsanomalie fir den August laut EFFIS | Grafik: forest-fire.emergency.copernicus.eu/

De Fazit

Geet et der momentaner Moment-Opnam no, dann erwaarden eis fir de Rescht vum Juli tendenziell iwwerduerchschnëttlech Temperaturen, iwwerdeems sech de Reen am ënnerduerchschnëttleche Beräich soll ophalen. Fir den August soll et och duerchschnëttlech ze mëll virugoen, iwwerdeems sech fir de Reen momentan keng kloer Richtung weist.

Wat och nach ze betounen ass: Wa vun iwwerduerchschnëttlechen Temperature geschwat gëtt, heescht dat net, dass mir et dauerhaft mat 30°C a wäit driwwer ze dinn hunn. Eng méintlech positiv Temperaturanomalie ka beispillsweis och duerch vill mëll Nuechten erreecht ginn, iwwerdeems dagsiwwer keng grouss Differenze gemooss ginn. Et ass also de “Gesamtpaket”, deen d’Moyenne am Endeffekt ausmécht. Net all Mount, deen ze waarm ass, muss automatesch mat enger oder e puer Hëtztwellen a Verbindung stoen. Wat de Reen betrëfft, kënne lokal Schaueren an Donnerwiederen och fir punktuell gréisser Ënnerscheeder suergen, déi vun dëse Laangzäitberechnunge mol net am geréngste Sënn kënnen erfaasst ginn.

Et ass also just eng Iddi dofir, a wéifern déi laangjäreg Moyenne kéint agehal ginn.

SkyWatch

Radar & aktuell Hiweiser a Warnungen