Zanter eisem leschten Update ass den ERIN als Hurrikan vun der zweethéchster, véierter Kategorie knapp un den Turks & Caicoinselen laanschtgezunn an hat sech en Dënschdemoie fréi eiser Zäit erëm op déi drëtt Kategorie ofgeschwächt. Zu dësem Zäitpunkt huet sech säi Wandfeld awer ugefaangen, weider auszebreeden. Als Hurrikan vun der zweeter Kategorie ass en tëscht dem Dënschdenomëtten an dem Mëttwochowend mat enger Distanz vu bal 700 Kilometer parellel vu Florida a Richtung Norde virugezunn, momentan befënnt e sech e puer honnert KIlometer ëstlech vun der Ostküst vu North Carolina – esou no wéi elo wäert de Stuerm den USA also net méi kommen.

Déi momentan Positioun an de weidere Parcours vum Hurrikan ERIN | Grafik: National Hurricane Center

Obwuel de Stuerm mat sengem Kär zwar wäit um Atlantik bleift, huet sech d’Wandfeld bis un d’Küsten ausgedeent. De National Hurricane Center warnt viru Wandvitessen um Niveau vun engem Tropestuerm. Desweideren ass laanscht bal déi ganz US-Westküst mat geféierleche Mieresstréimungen ze rechnen – et gëtt dringend dovun ofgeroden, schwammen ze goen. Duerch eng Stuermflut besteet fir sämtlech Strandbuden d’Gefor, dass se mat an d’Mier gerappt ginn.

Bunn fräi a Richtung Europa

Der Projektioun vum National Hurricane Center no läit d’Aen vum Hurrikan um fréie Samschdemoien eiser Zäit gutt 600 Kilometer süd-südëstlech vu Sydney (Nova Scotia), ier de ganze System um Samschdenowend an en aussertropescht Stuermdéif soll iwwergoen. Dëst heescht, dass den ERIN ënnert anerem duerch dat däitlech méi kalt Waasser seng tropesch Eegeschafte verléiert. E weidere Faktor ass den Jetstream, deen jo haaptsächlech fir d’Wiedergeschéien heiheem zoustänneg ass. Duerch dëse ginn d’Iwwerreschter vum Stuerm an eise Wiedersystem integréiert, et handelt sech also am Endeffekt guer net méi ëmt en Hurrikan. Zum Zäitpunkt vun der Ëmwandlung soll de Stuerm an der Moyenne ëmmer nach Vitesse vu bis zu 120 km/h generéieren.

Den Hurrikan ERIN daucht op den europäesche Wiederkaarten op | Animatioun: wxcharts.com

De meeschte Modeller no, esou och laut dem amerikaneshce GFS an dem europäeschen ECMWF no, wäert den Zentrum vum Déif en Dënschdemoien entweder knapp west-südwestlech vun Island leien, oder an enger gréisserer Distanz a Richtung Südwest. Vun do aus gesi sinn d’Onsécherheete vum weidere Lafwee grouss, mee egal wéi den exakte Parcours dann ausgesäit, kéinten d’Iwwerreschter vum ERIN dann dofir suergen, dass d’Dier eraus op den Atlantik wäit opgeschloe gëtt. Domat ass gemengt, dass sech dat liicht méi stabilt Héichdrockwieder, wat sech jo iwwert de Weekend bei eis kann duerchsetzen, erëm vun enger variabeler Weststréimung ënnerbrach gëtt.

Deemno wéi markante Virstouss vu waarme Loftmasse méiglech

Mat den Iwwerreschter vum ERIN iwwert dem nërdlechen Atlantik an och engem Héich iwwer groussen Deeler vu Mëttel- an Osteuropa wier de Setup perfekt, fir dass erëm waarm bis fläit esouguer héichsummerlech Loftmassen aus dem déiwe Südweste vun Europa op Lëtzebuerg kéinte gelenkt ginn – esou d’Iddi vum amerikanesche Wiedermodell GFS fir en Dënschden an e Mëttwoch (26.08 & 27.08). Den europäesche Wiedermodell huet zwar en ganz änlecht Muster a senge Berechnungen, allerdéngs soll et duerch dëse Virstouss net esou waarm ginn. Jo, Summerwäerter vun iwwer 25 Grad wieren dran, mee keng potenziell 30°C oder méi wéi de GFS et simuléiert.

D’Berechnung vum amerikanesche Wiedermodell fir den Dënschden | Grafik: wxcharts.com, Edit: Météo Boulaide

Och hei: Egal wéi et sech exakt ausspillt, gesinn déi zwee Modeller, dass mir op déi südlech Flank vun engem grousse Komplex aus Déifdrockgebitter geroden, dee säin Zentrum a Richtung Nordpolarmier leien huet. Fir eis heiheem kéint dat dann ëmmer erëm d’Geleeënheet erginn, dass et zu temporäre Virstéiss vu méi waarme Loftmasse kënnt, ier dann erëm eng Kalfront duerchrauscht. No dësem Prinzip kann et fir Mëtt der nächster Woch och net ausgeschloss ginn, dass et a Saachen Ex-Hurrikan ERIN fläit och mol zu enger Donnerwiederlag iwwert eisem Kontinent kéint kommen.

SkyWatch

Radar & aktuell Hiweiser a Warnungen