Wa mir eis déi akkumuléiert Reenzommen ukucken, déi bis e Sonnden inclus berechent ginn, da gesi mir, dass net nëmmen déi portugisesch a spuenesch Deeler betraff sinn, mee och an Italien a laanscht d’Westküsten vum Balkan gëtt de Reen relevant. Den europäesche Modell ECMWF rechent am Raum Sevilla mat tëscht 75 an 140 l/m² an de Spëtzten, vu Lissabon bis erop op Braga si bis zu 100 l/m² ze erwaarden.
Nach manner flott Aussiichte ginn et fir de Raum v um Liguresche Mier, an domat ass och de Groussraum Marseille mat dobäi. Vun do aus bis op Corse a Florence an Italien kënnen dem Modell no tëscht 100 an deels iwwer 200 l/m² Reen erofkommen. Och an der Géigend vu Roum soll et mat ëm 100 l/m² esou richteg naass ginn. Am Balkanraum zitt sech de Beräich mam onwiederaartege Reen vun Tirana iwwert de Weste vu Montenegro, Bosnien, Kroatien, Slovenien a nach weider an d’Alpen eran. Et kënne méi wéi 150 l/m² Reen erofkommen, an de Staulagen nach e bësse méi.
Wat d’Zäit duerno betrëfft, ass an de betraffene Géigende mat weiderem Reen ze rechnen. D’Déifdrockaktivitéit schéngt nach esoubal net nohalteg ofzehuelen.