Aktuelle Stand
Den Tropestuerm ETA huet e ganz laangen a chaotesche Wee hannert sech. Méi doriwwer fannt Dir an dësem Artikel. Den ETA ass de Moment erëm en Tropestuerm a läit genee westlech vun Tampa, Florida (Stand: 12.11.2020 – 03:35 Auer eiser Zäit) an zitt an de nächste Stonne weider a Richtung Nord-Nordosten. E soll ongeféier bei Yankeetown u Land goen, dat mat maximale Wandstéiss vun ëm 120 km/h an enger méisseger Stuermflut. Den Donneschdemëtte soll de System iwwer Jacksonville erëm op den oppenen Atlantik erauszéie fir dann do definitiv lues a lues dem Enn vun enger zimmlech laanger Karrière entgéintzekucken.
Kuerzzäiteg erëm Hurrikan
Ier den ETA Florida méi no komm ass, huet e sech nach eng Zäitchen iwwert dem waarme Golf vu Mexiko opgehalen. Do konnt e sech kuerzzäiteg erëm an en Hurrikan vun der éischter Kategorie op der Saffir-Simspon Skala intensivéieren, dat mat enger gemëttelter Wandvitesse vun 121 km/h a Spëtzte vun ëm 145 km/h. Dat war den 11. November géint 16 Auer, schonn nëmmen dräi Stonne méi spéit war et erëm nëmme nach en tropesche Stuerm.