Vill Nidderschlag: Verschidde Modeller rechne bis e Sonnde mat bal 100 l/m²

De Schnéi wäert an dëser Woch méi e Randphänomen sinn, wann ee sech déi momentan Kaarten esou ukuckt. Bis e Sonnde solle nämlech, all Nidderschlagszort abegraff, bal 100 l/m² vum Himmel kommen.

Elo an der neier Wiederwoch ass et eriwwer mam rouege Modus, wéi mir en aus de leschte Woche gewinnt waren. Een Déifdrockgebitt nom aneren zitt duerch a bréngt eis esou ëmmer erëm Nidderschléi op Lëtzebuerg. Phaseweis ass dat, wéi mir jo wëssen, als Schnéi de Fall – iwwert déi ganz Woch gekuckt wäert de Reen awer d’Iwwerhand hunn.

Déi berechent Zommen

Den europäesche Wiedermodell ECMWF gesäit am Zäitraum vun elo bis e Sonndenowend spéit tëscht 50 a punktuell 80 l/m² vum Himmel kommen. Den amerikanesche Modell GFS toppt dat ganzt nach mat Wäerter vun tëscht 60 a 85 l/m², a Richtung Weste ginn esouguer 95 l/m² ugedeit. Den däitsche Modell ICON stëmmt dësen Iddien zou a gesäit tëscht 50 a knapp 80 l/m² Nidderschlag op eis duerkommen. Den englesche Modell UKMO ass mat tëscht 50 a 65 l/m² dobäi.

Et stinn also zimmlech sécher immens naass Zäiten un. Phase mat méi staarkem Nidderschlag wieren de Mëttwochmoien, den Donneschdenowend, de Freidenomëtten/Owend, de Samsdenomëtten, a méiglecherweis och de Sonndenowend.