Wand: Dat waren déi héchst Spëtzten aus de leschte Stonnen

Fir de Sonndenowend war eng Wiederwarnung vun der gieler Stuf aktiv. An dësem Réckbléck kucke mir, wou et am kräftegste geblosen huet.

Nëmme lokal warnrelevant Vitessen

Fir de Sonndenowend ware Wandspëtzten ugesot, déi sech gréisstendeels ënnert der Schwell vun enger gieler Wiederwarnung ophale sollen, nämlech am Beräich vun tëscht 60 a 75 km/h. Lokal wier awer eppes driwwer net ausgeschloss, dowéinst gouf awer op eng giel Wiederwarnung zréckgegraff. E weidere Parameter, deen dofir geschwat huet, waren deels méi kräfteg Schaueren an och mol déi eng oder aner Blëtzentluedung – am Beräich vun dësen war de Risk vu Stuermstéiss erhéicht. De Maximum gouf an der Warnung mat bis zu 85 km/h definéiert.

Elo, wou mir op déi tatsächlech Donnéeën zréckkucke kënnen, kann een de Fazit zéien, dass d’Wandspëtzte meeschtens bei tëscht 55 a 70 km/h ënnerwee waren. Déi héchst Vitessen hate mir un der Kachelmann-Wiederstatioun Stad-Pescatore mat 78 km/h, opgetrueden am Beräich vu méi kräftegem Reen. E weidere Stuermstouss gouf et dann och nach zu Ëlwen mat 76 km/h. Knapps hannendrun, mee kee Stuermstouss, ass Käerjeng-Kënzeg mat 74 km/h an duerno Stengefort mat 72 km/h.