Scho knapp iwwer eng Woch laang ass et hier, dass mir iwwert den éischten Zäitpunkt spekuléiert hunn, wou mat Chance den éischte Schnéi vun der Saison vum Himmel komme kéint. Elo fänken d’Modeller tatsächlech un, eng ëmmer méi kloer Sprooch ze schwätzen. Elo musse se just nach hirer Linn trei bleiwen. Mee wat geschitt iwwerhaapt?
Bis den Donneschden inclus leie mir gréisstendeels ënnert dem Afloss vun héijem Loftdrock, duerch deen et zimmlech roueg a nidderschlagsfräi an eise Géigenden ass (wann een de Niwwel ewechrechent). Déi ganz Déifdrockaktivitéit gëtt zu engem groussen Deel ronderëm ofgeleet, wat wanterlech Zenarien a Form vu Schnéi fir eis mol nach onméiglech mécht – mee net méi laang.
Eist Héichdrockgebitt gëtt den aktuelle Modellrechnunge no um Freiden aus eise Géigende verdrängt – et gëtt Plaz gemaach fir déiwe Loftdrock, deen säi Wee iwwer d’Nordséi op Lëtzebuerg fënnt. Ënnerstëtzt gëtt dëst Déifdrockgebitt vun engem groussen Héichdrockgebitt iwwert dem Atlantik: well déiwe Loftdrock géint den Auersënn dréint an héije Loftdrock am Auersënn, ginn dotëscht kill Loftmassen aus der Polarregioun an eis Géigende gedréckt. E weideren Ënnerstëtzer-Faktor ass deen, dass weider kleng Déifdrockgebitter bei eis hin erofgezu kommen. Eent vun deene positionnéiert sech iwwert dem Oste vu Polen, dat anert iwwert dem Ärmelkanal. Wann een dann esou wëll, hu mir et net nëmme mat engem spezifeschen Déifdrockgebitt ze dinn, mee mat engem Déifdrockkomplex. D’Kombinatioun aus all dësen Drockgebitter, sou gesinn et déi meescht Modeller de Moment, loossen d’Zoufuer vu killen an deels och méi fiichte Loftmassen iwwert e puer Deeg laang zou: heescht: och d’Warscheinlechkeet vun den éischte Flacke klëmmt nennenswäert.