Am Aen halen: Vu muer den Owend bis Samschdemëtte gréisser Reenzomme méiglech

Muer den Owend kënnt aus Frankräich e klengt Déif eropgezunn. Et kënnt dobäi awer op den exakte Lafwee vum Kär un: De Grat tëscht enger “reenereger Nuecht” a warnrelevante Reenzommen ass immens schmuel.

Zanter gëschter Moie kënnt et a Südfrankräich an aneren Deeler am westleche Mëttelmier zu immens grousse Reenzommen, deels goufen iwwer 600 l/m² a manner wéi 40 Stonne gemooss. Dëst Déif wandert elo weider a Richtung Norden a wäert an ofgeschwächter Form an eiser Groussregioun opdauchen.

Wéi d’Déif muer den Owend an eis Géigenden eropgezu kënnt laut ICON-EU-Modell | Animatioun: wxcharts.com

Trotzdeem kënnen ëmmer nach warnrelevant Reenzommen optrieden, dat awer just an engem schmuele Beräich. Well d’Lëtzebuerger Land esou kleng ass, gëtt eng akkurat Prognos dës Kéier also erëm eng richteg Erausfuederung.

De Verlaf

Muer um Freiden dauert et eng méi laang Zäit, bis de Reen lues a lues bei eis ukënnt. Fréistens soll dat am fréie Nomëtten de Fall sinn, déi meescht Modeller tendéieren awer méi a Richtung spéidere Nomëtten/fréien Owend. An Tëschenzäit si sech all d’Modeller driwwer eenz, dass eis d’Reegebitt, wat un dëst Déif gekoppelt ass, wäert erwëschen. Wat just net ganz kloer ass, sinn d’Intensitéit an déi genee Positioun vum Kär vum Déif – dës zwee Faktoren hunn en immens groussen Afloss dorop, wéi vill Reen schlussendlech wierklech un der Zomm bei eis erofkënnt. D’Span vu nennenswäerten Zomme bis hin zur Warnrelevanz ass ginn, de Grat tëscht deenen zwee ass immens schmuel. Well et op 50 – 150 Kilometer Positiounsënnerscheed vum Kär ukënnt, kann een och vum klassesche Butterfly-Effekt schwätzen.

Déi Modeller, déi besoen, dass eis de méi intensiven Deel trëfft, berechne fir de relevanten Zäitraum vum Freidenowend bis de Méindemëtten folgendes:

• ICON-D2: 20 – 66 l/m²
• ICON-EU: 10 – 47 l/m²
• HARMONIE-DMI: 15 – 47 l/m²
• SuperHD: 22 – 32 l/m²
• UKMO: 7 – 43 l/m²

Duerchschnëtt: 14,8 bis 47 l/m²

Déi Modeller, déi däitlech manner héich bis moderat Zomme berechne, sinn:

• S-ez4: 2 – 11 l/m²
• UKMO-UK: 8 – 23 l/m²
• ECMWF: 10 – 21 l/m²
• GFS: 10 – 22 l/m²

Duerchschnëtt: 7,4 bis 19,25 l/m²

Egal wéi een Zenario et gëtt: De Gros vum Reen soll tëscht dem spéide Freidenowend (18.10.2024 22:00) an dem fréie Samschdevirmëtten (19.10.2024 08:00) erofkommen. Sollt et den éischten Zenario mat de gréisseren Zomme ginn, wier engersäits eng Warnung fälleg an anerersäits kéint et dann, op d’mannst lokal, zu Iwwerschwemmunge kommen. Muer komme weider Updates.