Vun den Owend un an och iwwert d’Nuecht beweegt sech d’Stuermdéif mat sengem Kär iwwert den Ärmelkanal a Richtung Nordséi a wäert iwwerdeems un Intensitéit gewannen. Den Zentrum soll en Donneschdemëtte gréisser Deeler vun der Nordséi bis erof an d’Belsch/Holland beaflossen – zumools falls sech de Kär um südlechsten deel Zentrum orientéiert, sinn heiheem nach méi héich Wandvitesse méiglech.

Markante Loftmassenaustausch duerch d’Stuermdéif. Gutt ze erkennen ass de viraussiichtleche Lafwee vum Kär | Animatioun: wxcharts.com

Et gëtt also e “gemëttelten” Zenario fir Lëtzebuerg, mee awer och een “gehuewenen”, deen méi intensiv kéint ausfalen. Wéi sech dës Situatioun mam Kär wäert ausspillen, entscheet sech ganz warscheinlech nëmme kuerzfristeg.

Den Donneschdenowend läit den Zentrum vum Stuerm knapp westlech vun Dänemark/iwwert dem Weste vun Dänemark, wouduerch et heiheem zwar nach lëfteg bleift. Stuerm ass dann awer kee méi dran.

Schonn eng turbulent Nuecht a Frankräich

Momentan gräifen déi éischt Ausleefer vum Stuerm schonn op den äussere Weste vu Frankräich aus. Am weidere Verlaf vum Owend bis muer de Moie fréi ass domat ze rechnen, dass sech iwwert dem Hexagon verbreet kräfteg Nidderschléi forméieren. Bei eenzelnen dovun handelt et sech ëm intensiv Schauer- an Donnerwiederzellen, déi virun allem vun enger immens staark ausgepräägter Wandscherung profitéieren – also dem rapide Changement vun der Wandrichtung- & Vitesse mat der Héicht. Dës Zelle kënnen, sollt genuch potenziell Energie zur Verfügung stoen, zu sougenannte “Low Topped Supercells” ginn – déi selwecht Zort un Zell, déi e Méinden de staarken Tornado bei Paräis produzéiert hat.

Wandscherung ass masseg do. Et kënnt just dorop un, wou sech dann e bësse CAPE (Energie) mat dëser Scherung kann iwwerlappen | Grafik: Météo Boulaide

Doduerch, dass et och dës Nuecht iwwer Frankräich erëm zu enger “High Shear Low Cape”-Situatioun kënnt, ass et net ausgeschloss, dass et punktuell erëm zur Bildung vun engem kuerzliewegen Tornado kënnt. Dës Setups sinn an eise Breete näischt ongewéinleches, mee awer nennenswäert. Wichteg: Dëst ass just d’Beschreiwung vun engem Potenzial an op kee Fall eng Garantie. Op der Kaart hei driwwer ass méi verständlech duergestallt, wou den héchste Risk besteet.

Gëtt net esou vill “CAPE” (Energie) generéiert wéi d’Modeller et undeiten, gëtt den Tornado-Risk reduzéiert.

Lëtzebuerg: Stuermstéiss vum Virmëtten un

An der fréier Nuecht erreechen eis heiheem och déi éischt Nidderschléi. Bis muer de Moie fréi soll dat esou bleiwen, deemno wéi ass och schonn e lokaalt Donnerwieder méiglech. Ass dat de Fall, da kann et ënnert dëse spezifeschen Zelle schonn zu stiermesche Wandstéiss oder och Stuermstéiss kommen. Vum Virmëtten u stellt sech bei eis awer viraussiichtlech eng méi “roueg” Phas a Saache Nidderschléi an, an där et zu méi laange Pausen an engem kuerze Sonn-Wollekemix ka kommen. De Wand gëtt ëmmer méi staark, tëscht 60 an 80 km/h kënnen erreecht ginn.

De momentan berechente Verlaf vun de Wandspëtzte laut ICON-EU-Modell fir den Donneschden | Animatioun: wxcharts.com

Mëttes an am Nomëtten kënnt Reen op – an dëse kënnen e puer kräfteg Schauerlinnen/Staffelen agelagert sinn. Dat engt oder anert Donnerwieder ass och méiglech. Generell ass mat Wandvitesse vun tëscht 75 a 90 km/h ze rechnen – ënnert dëse potenzielle méi kräftege Schliet sinn awer och lokal schwéier Stuermstéiss bis ëm 100 km/h oder eppes driwwer net onméiglech. Hierschtstierm si näischt aussergewéinleches, mee doduerch dass vill Beem hir Blieder nach hunn kënnen dës séier ëmfalen. Et ass also och mat Beanträchtegungen am Stroosseverkéier ze rechnen. Gitt net an de Bësch spadséieren.

Berouegung am Laf vum Owend

Den Zäitpunkt vum Maximum vum Wand gëtt nach liicht ënnerschiddlech berechent, e sollt awer tëscht 14 an 18 Auer stattfannen. Eenzel Modeller gesi nach e Spillraum bis 20 Auer. Duerno hëlt de Wand of, e bleift awer ëmmer nach spierbar. Et kënnt och ëmmer nach zu geleeëntleche Nidderschléi, mee och dës huele vun hirer Intensitéit hier of. E Freide stiermt et zwar net méi esou richteg, an awer sinn ëmmer nach lokal Spëtzte vun tëscht 50 a 70 km/h méiglech.

Vill Reen: Lokaalt Erreeche vu Warnschwellen?

Zanter de Mëtten ass fir déi westlech Deeler vum Land eng Virwarnung virun Dauerreen aktiv. Och den Owend gesinn d’Modeller ëmmer nach de Risk, dass et an dësem definéierte Beräich zu Reequantitéite vun tëscht 25 a 40 l/m² an Zäit vu 24 Stonne kéint kommen. Sollt dat méi spéit nach esou sinn, da kann aus der Virwarnung eng akut Dauerreenwarnung resultéieren.

Eenzel Modeller gesinn zumools laanscht den äussere Weste vun eisem Land potenziell warnrelevante Reen | Grafik: wxcharts.com

Mee och op anere Plaze versprécht et e naassen Dag ze ginn – inkl. awer den ugekënnegte Pausen dotëscht.

Aktualitéiten

Mëttelfrist: Tëscht ze waarm an den éischte wanterleche Versich

Ausbléck: Lokale Frascht, minimale Changement

Trend: Iwwerduerchschnëttlech Loftmasse fir dës Woch