Et gëtt méi naass
Wéi am Artikel vu gëschter beschwat, ass den héije Loftdrock amgaangen ofzehuelen. Haaptsächlech fir déi zweet Wochenhallschent gi sech méi oft Nidderschléi erwaart, déi heiansdo och mol e bësse méi kräfteg ausfale kënnen – dat virun allem am Fall vun eenzelne Schaueren.
Dem europäesche Wiedermodell no si bis e Sonnden inclus akkumuléiert gesinn tëscht 30 a 50 l/m² Reen ze erwaarden. D’Berechnung vum amerikanesche Modell ass mat tëscht 25 an ëm 50 l/m² guer net esou wäit ewech vun där Iddi. Ënnerstëtzt gëtt dat Ganzt vum däitsche Modell ICON, deen esouguer virun allem am Weste bis ëm 60 l/m² op eis duerkomme gesäit. De franséische Modell ARPEGE weist sech mat 10 bis 25 l/m² nach am zréckhalendsten.