Wat féiert dozou?
De Wand wäert schonn am Laf vum Sonnden ufänke méi markant ze ginn. De Grond dofir ass en Déifdrockkomplex iwwert dem nërdlechen Atlantik & de britteschen Inselen, deen vun Héichdrockafloss iwwert dem Mëttelmierraum “gekontert” gëtt. D’Loftmassen drécken also widderteneen – a genee dotëscht ass mat kräftegem Wand bis hin zu Stuerm ze rechnen. Datumer, déi een muss am Aen hale, sinn also de Méinden, Dënschden an och e Mëttwoch.
Et sollt ee sech awer elo kee Joerhonnertstuerm erwaarden. An engem duerchschnëttleche Wanter ass et normal, dass et zu Stuerm- oder Orkandéifer kënnt.
Déi viraussiichtlech Wandvitessen
Wa mir op den aktuelle Stand vun de Modeller aginn, da kënne virun allem vum Sonndenowend un verbreet Wandvitessen vun iwwer 50 km/h optrieden. Laut dem amerikanesche Modell gëtt et dann vun der Nuecht op e Méinden un interessant, et gi Stuermstéiss vun tëscht 75 a 90 km/h berechent. Bis an de fréie Nomëtten era soll et dann esou bleiwen, ier sech de Wand lues a lues leet.
Den europäesche Modell rechent vum fréie Méindemoien un mat Spëtzte vun ëm 60 km/h, déi sech nach wärend dem Virmëtten op 80 km/h kënne verstäerken. Dem däitschen ICON no wier et änlech, mee just am Laf vum Nomëtten.
Et ginn also nach zäitlech Ënnerscheeder, mee d’Iddi ass déi selwecht – mir halen dës Berechnungen an de nächsten Deeg natierlech zesummen am Aen!
En Dënschde si Spëtze bis 60 km/h dobäi, e Mëttwoch och. Dëse Wäert ass awer nach héich-spekulativ – do musse mir nach e bësse waarden, bis een eppes domat kann ufänken.