Den amerikanesche Wiedermodell GFS rechent bis de Freidenowend spéit mat 3 bis 10 l/m², dat meescht gëtt erëm fir d’Nordspëtzt vum Land berechent. De Weste vum Land soll am mannste Naasses ofkréien.
Den europäesche Modell ECMWF rechent mat tëscht 7 a 15 l/m² an huet zwee Schwéierpunkten: D’Nordspëtzt a laanscht déi franséisch Grenz. Dat meescht dovu soll tëscht haut den Owend a muer de Moien erofkommen.
De franséischen ARPEGE rechent mat tëscht 2 a 4 l/m². De Südoste soll am dréchensten ausgoen, iwwerdeems de Nordoste vum Land de meeschte Reen ofkréie sollt. Zu gudder Lescht dann och nach den däitschen ICON, deen tëscht 0 a 4 l/m² an der Simulatioun huet. Tendenz: de Norde gëtt am naassten.
Fazit: Den amerikanesche GFS an den europäeschen ECMWF ginn en Hiweis drop, wat am Fall vun enger méi kräfteger Schauer- oder Donnerwiederzell méiglech ass. Meeschtens sollten d’Quantitéiten awer drënner bleiwen. Den ARPEGE kéint fir déi meescht Plazen am Land am realisteschste sinn.
