Schonn Deeg a Woche laang ass et zimmlech lefteg zu Lëtzebuerg, zäitweis ass et och schonn fir méi stiermesch Ofschnëtter duergaangen. E richteg ausgewuessene Stuerm hate mir bis elo awer nach net. Ka sech dat awer duerch déi weider Westwiederlag a nächster Zäit änneren?
Fir déi nächst Deeg ginn et ëmmer erëm Signaler fir lefteg bis hin zu stiermesch Situatiounen. Eng vun dëse Situatiounen hu mir en Donneschdemoie, wou eis e méi kräftegt Wandfeld usteet. Stiermesch Wandstéiss bis hin zu Stuermstéiss vun tëscht 65 an 80 km/h sinn duerchaus méiglech. Vum Donneschdenomëtten u berouegt sech d’Situatioun erëm e bëssen, lefteg bleift et awer trotzdeem.
De nächsten Zäitpunkt soll de Samsdenowend sinn: Fir e kuerze Moment rechent den amerikanesche GFS mat Stuermstéiss bis hin zu 85 km/h. Um Sonndemoie sollt sech dat Ganzt erëm berouegt hunn. Den europäesche Modell gesäit d’Situatioun e bësse méi entspaant an huet just méi kräfteg Wandstéiss an der Berechnung.
Och bis wäit an déi nächst Woch era bleift et lefteg, zäitweis kënne sech kuerzfristeg stiermesch Situatiounen an de Modellkaarten opdinn. E richteg ausgewuessene Stuerm mat orkanaartege Wandstéiss, sou wéi mir se aus de leschte Wantere kennen, sinn de Moment awer net um Schierm.