Ausbléck: Wéi vill Reen kënnt bis e Sonnden inclus erof?

Am Bléck op de Weekend hu mir jo gesinn, dass eis kee wierklech agréabelt Wieder usteet. Fir déi, déi et genee wëlle wëssen, kucke mir op d’Reequantitéiten déi bis e Sonnden inclus erofkomme kënnen.

De Weekend iwwer ginn et zwar Onsécherheeten doriwwer, wéi sech eist momentant Déifdrockgebitt tatsächlech iwwert eis ewechbeweege wäert – Mee egal wéi ee Wee et hëlt, gëtt et gutt naass zu Lëtzebuerg.

Den amerikanesche Wiedermodell GFS gesäit vun elo bis e Sonnde mat Quantitéite vun tëscht 30 a 48 l/m² op eis duerkommen. Den europäesche Modell ECMWF gesäit dat net vill anescht an ass mat tëscht 30 a 40 l/m² dobäi. Den däitschen ICON setzt méi wäit ënnen un, mécht awer mat 20 bis 40 l/m² keng grouss Differenz. Och de franséischen ARPEGE ass der Meenung, dass eis an de nächsten Deeg e bëssen eppes u Reen usteet: tëscht 25 a 40 l/m² gi berechent.

Hëlt een d’Moyenne vun de jeeweilege nidderegsten an héchste Wäerter, da kënnt een bei tëscht 26,25 a 42 l/m² Reen eraus, déi bis e Sonnden inclus zu Lëtzebuerg kënnen erofkommen. No de villen dréchene Phasen aus der Vergaangenheet wäert sech d’Natur sécherlech driwwer freeën.