An de nächsten Deeg ginn d’Meenunge vun de Modeller rem deelweis méi wäit auserneen. Den amerikanesche GFS rechent mat 5 bis 9 l/m², dat meescht dovu soll haut a muer falen. De “Schwéierpunkt”: de Südosten. Den europäeschen ECMWF rechent mat 2 bis 9 l/m², dat meescht soll muer um Donneschden erofkommen. De meeschte Reen wier un der Nordspëtzt vum Land ze erwaarden.
Mat däitlech manner Reen ass de franséischen ARPEGE ënnerwee, dee grad mol 1 bis 3 l/m² simuléiert. Och dësem Modell no soll et an der Nordhallschent tendenziell am naasste ginn. Den däitschen ICON ass mat 2 bis 10 l/m² a rechent am Südoste vum Land mam meeschte Reen. A Richtung Westen/Nordweste soll et am mannste naass ginn.
Och iwwert de Weekend eraus kann et zäitweis mol kuerz an e bësse naass ginn, gréisser Quantitéite sinn awer keng an Aussiicht.
