Hurrikan IAN huet sech massiv verstäerkt
An der vergaangener Nuecht huet den Hurrikan IAN nach Wandvitesse vun 195 km/h an der Moyenne erreecht, dat als Hurrikan vun der drëtter Kategorie. Nëmme sechs Stonne méi spéit huet e sech zu engem Hurrikan vun der véierter Kategorie op der Saffir Simpson-Skala virunentwéckelt a packt et an Tëschenzäit op 250 km/h an der Moyenne – a krazt domat esouguer un der fënnefter Kategorie.
An de kommende Stonnen trëfft d’Aen vum Stuerm knapp nërdlech u Fort Myers u Land a wäert laanscht d’Küst entlaangzéien, ier et dann bei Englewood esou richteg a Florida eranzéie wäert. Nieft dem zolitte Wand gëtt sech eng Stuermflut vun tëscht zwee bis fënnef Meter erwaart, mat dobäi solle punktuell méi wéi 300 l/m² Reen vum Himmel kommen. Zu den zousätzleche Gefore gëllen Tornadoen, déi schonn gëschter iwwer Florida opgetruede sinn.