Ausland: Weiderhi Risk vun Iwwerschwemmungs-Onwieder am Mëttelmier

Déi schro Onwieder aus de leschten Deeg wäerten definitiv net déi lescht gewiescht sinn. Alleng bis muer si virun allem am adriatesche Raum gréisser Reenzomme méiglech.

All Joer, wann de Peak vum Summer lues awer sécher duerch ass, klëmmt d’Warscheinlechkeet vun Onwieder iwwert dem Mëttelmierraum. De Grond dofir ass, dass sech d’Lofttemperature vill méi séier kënne verännere wéi d’Waassertemperaturen. Beweegt sech also en Déif mat méi kille Loftmassen iwwert en ëmmer nach däitlech méi waarmt Waasser, da kënne sech doraus markant Wiedersystemer forméieren, déi an éischter Linn fir grouss Reenzomme suergen.

De Fakt, dass d’Mëttelmier ëmmer méi waarm gëtt, spillt dem Risk fir Onwieder leider an d’Kaarten. De 16. August 2024 gouf déi héchst jeemools gemoosse Waasseruewerflächentemperatur registréiert, dat mat engem Peak vun 31°C virun der Küst vu Palermo, Italien. Déi westlech Deeler vum Mëttelmierraum haten den Dag eng Temperatur vun tëscht 24 an 28°C, déi zentral a méi südledch geleeë Géigenden 28 bis 30°C. Schonn Deeg virdrun ass bekannt ginn, dass duerch eng duerchschnëttlech Waassertemperatur vun 28,15°C e neie Rekord opgestallt gouf.

Et ass also domat ze rechnen, dass mir an de nächste Wochen a Méint weiderhi keng all ze schéi Biller vun do ënne wäerte gesinn. Och d’Formatioun vu sougenannte “Medicanes” (Mediterranean Hurricanes) gëtt doduerch begënschtegt.

Iwwerschwemmungsgefor un der Adria

Déi adriatesch Géigenden hu bis muer, den Dënschdenowend, schonn erëm gréisser Reenzommen ze erwaarden. Dem europäesche Modell no ass mat tëscht 30 a punktuell 84 l/m² ze rechnen, de méi héichopgeléiste Modell ICON-EU gesäit haaptsächlech iwwert dem Mier selwer e puer Peaks vu bis zu 130 l/m². Fir déi direkt Küstegéigende kann dat awer och u Land Auswierkungen hunn.