De Freide starte mir wuel nach e bësse méi gro an den Dag eran. Anescht wéi un den aneren Deeg soll et am Laf vum Dag awer eng gewëss Chance ginn, dass sech d’Sonn mol weise kënnt. D’Temperature starte bei -4 bis -1 Grad a packen et am Dag op tëscht -1 an 3 Grad. Um Samsde geet et mat -6 bis -2 Grad lass – Dir mierkt… déi kill Loftmasse maache sech definitiv bemierkbar. Am Laf vum Dag ass mat engem Maximum vun tëscht -2 an 2 Grad ze rechnen. Änlech wéi um Freide ka sech d’Sonn weise kommen, esoubal sech de Niwwel opgeléist huet. Nidderschléi sinn also weiderhi keen Thema. De Sonndemoie leien d’Déifsttemperature bei tëscht -5 a -2 Grad, am Nomëtte klammen se op -3 bis 1 Grad erop. Am Nomëtte sinn jee no Modell och mol liicht Schnéischauere méiglech. Egal wéi et kënnt, si keng gréisser Quantitéiten ze erwaarden.
D’Keelt huele mir bis op mannst emol de Mëttwoch vun der neier Woch mat. Nidderschléi sinn dobäi éischter rar, well sech dotëscht och erëm héije Loftdrock iwwert eise Käpp duerchsetze kann. Wat a Richtung nächste Weekend geschitt, bleift awer weiderhin immens interessant.
