D’Grousswiederlag
De Weekend iwwer gëtt eist Wieder haaptsächlech vun héijem Loftdrock bestëmmt, deen just muer um Freide nach kuerz vun engem klengen Déifdrockgebitt gestéiert gëtt. A Richtung Sonnde ginn eis Temperaturen zwar liicht zréck, mee als wierklech kal kann een eist Wieder och net beschreiwen.
De Verlaf
An der Nuecht op de Freiden erreecht eis e Batz Reen, deen sech am Laf vum Dag selwer awer a Richtung Däitschland wäert verzéien. Iwwereg bleift e Mix aus Sonn a Wolleken, iwwerdeems dotëscht ganz lokal a punktuell begrenzt mol nach eng Schauer oder e kuerzt Donnerwieder erofkomme kann. De Risk fir en Donnerwieder besteet awer éischter méi iwwer Däitschland. D’Temperature klammen op e Maximum vun tëscht 15 a 17 Grad. De Frascht hu mir och hannert eis gelooss, e Freidemoie starte mir nämlech bei 7 bis 10 Grad an den Dag eran.
E Samsde geet et mat 6 bis 8 Grad un, am Nomëtte ginn 12 bis 16 Grad als Maximum erreecht. Sonn a Wolleke wiessle sech of an et bleift dréchen. E Sonnden ännert sech net vill: Sonn a Wolleke wiessle sech of an et sollt dréche bleiwen. D’Temperaturen erreechen e Maximum vun tëscht 14 a 16 Grad.