D’Westwiederlag, ënnert där mir de Moment stinn, setzt sech de Weekend iwwer fort. Nieft e puer eenzelne sonnege Momenter hunn d’Wolleke meeschtens d’Iwwerhand, dobäi gëtt et tëschenduerch naass. Et bleift iwwerduerchschnëttlech mëll.
fir d’lescht aktualiséiert: 23. Oktober 2020 – 02:00 Auer
Déiwe Loftdrock bestëmmt zu engem groussen Deel eist Wieder de Weekend. D’Temperature bleiwen ëmmer nach an engem fir d’Joreszäit ze waarme Beräich, haaptsächlech de Sonnden erwaart eis nach eng Kéier e klenge Peak. Grond dofir ass e grousst Déif iwwert dem Nordatlantik, wouduerch alt erëm méi mëll Loftmassen aus dem Mëttelmierraum an eis Richtunge gedroe ginn.
Freiden, 23. Oktober 2020
De Freidemoien ass den Himmel staark bedeckt an et reent, d’Temperature leien tëscht 11 a 15 Grad a klammen am Virmëtte net vill méi wäit. Et gëtt lues a lues méi dréchen. Mëttes an am Nomëtte sinn Dageshéchsttemperature vun 13 bis 16 Grad ze erwaarden, dobäi bléist e liicht spierbare Wand aus West-Südwesten. An de Spëtzten ass e mat 30 km/h ënnerwee. Et bleift weiderhi wollekeg, et kënnen erëm eenzel Schaueren optrieden. Just mat Chance kënnt sech d’Sonn tëschenduerch weisen. Um Owend an an der Nuecht ginn d’Temperaturen op 12 bis 9 Grad zréck, et gëtt ëmmer manner wollekeg. Et wäert Plaze ginn, wou et och ganz opkläert.
