Bléck op de Weekend: Um Sonnden minimal Schauerwarscheinlechkeet

Mir kucken eng éischt Kéier op de Weekend. Et bleift wuel roueg, eréischt um Sonnde klëmmt eng minimal Reenwarscheinlechkeet.

Grousswiederlag

E grousst Héichdrockgebitt läit iwwert dem europäesche Kontinent a blockéiert esou de ganzen Déifdrockafloss, deen ronderëmt eis lauert. Aus dësem Grond bleift et fir de Rescht vun der Woch zimmlech roueg.


D’Grousswiederlag iwwert de Weekend | Animatioun: wxcharts.com

Freiden, 14. Januar 2022

De Freidemoien ass den Himmel kloer bis plazeweis gro duerch Niwwel, d’Temperature leien tëscht -3 an 0 Grad. Am Virmëtte klammen des Wäerter op tëscht 1 an 3 Grad erop, de Niwwel sollt sech lues a lues opléisen. Mëttes an am Nomëtte si Maximaltemperature vun tëscht 5 a 7 Grad ze erwaarden, de Wand bléist schwaach aus Nordosten. An de Spëtzten ass e mat 20 km/h ënnerwee. Ass de Niwwel fort, da schéngt d’Sonn iwwer Bierg an Dall. Um Owend an an der Nuecht ginn d’Temperaturen op tëscht -2 an 1 Grad zréck, et ass erëm mat lokal glate Streckenofschnëtter & Niwwel ze rechnen.

Samsden, 15. Januar 2022

De Samsdemoien ass et liicht wollekeg bis gro duerch Niwwel, d’Temperature leien tëscht -2 a 0 Grad a klammen am Virmëtten op tëscht -1 an 1 Grad erop. Et bleift weiderhin onverännert. Mëttes an am Nomëtte si Maximaltemperature vun tëscht 1 an 3 Grad ze erwaarden, de Wand bléist schwaach aus Osten. An de Spëtzten ass e mat 30 km/h ënnerwee. Wa sech de Niwwel opléist, schéngt d’Sonn iwwer Bierg an Dall. Um Owend an an der Nuecht ginn d’Temperaturen op tëscht -2 a 0 Grad zréck, et zéien op e Neits e puer Niwwelfelder op. Glat Stroosse kënne net ausgeschloss ginn.

Sonnden, 16. Januar 2022

De Sonndemoien ass et kloer bis liicht wollekeg, plazeweis sinn och erëm méi déck Niwwelfelder um Wierk. D’Temperature leien tëscht -2 an 1 Grad a klammen am Virmëtten op tëscht -1 an 2 Grad erop. Et bleift onverännert, lokal ass et méi gro duerch décke Niwwel. Mëttes an am Nomëtte si Maximaltemperature vun tëscht 1 an 3 Grad ze erwaarden, de Wand bléist schwaach aus West-Südwesten. An de Spëtzten ass e mat 30 km/h ënnerwee. Et komme méi déck Wolleken op, déi d’Warscheinlechkeet vun enger Schauer minimal an d’Luucht drécken. Et sollt trotzdeem meeschtens dréche bleiwen. Um Owend an an der Nuecht pendle sech d’Temperaturen tëscht 2 a 4 Grad an, et bleift bedeckt.