Et wäert an de nächste Stonne weiderhi no a no méi lefteg ginn, ier vu Mëtternuecht u mat Stuermstéiss bis hin zu schwéiere Stuermstéiss vun tëscht 75 a 95 km/h ze rechnen ass. Dat geet schonn duer, dass Beem an och gréisser Äscht an d’Stroosse fale kënnen an och aner Géigestänn vum Balkon geblose ginn. Vu ronderëm 2 Auer un bis moies 7 Auer klëmmt de Risiko vu kräftege Schaueren an och mol Donnerwieder, déi awer just lokal optriede wäerten. Do wou se optriede kënne se duerchaus awer och schwéier Stuermstéiss bis hin zu 105 km/h ausléisen oder och mol driwwer. De Grond dofir ass de Wand, deen ënnert de genannten Ëmstänn aus méi héije Loftschichten op de Buedem erofgemëscht ka ginn (vertikalen Impulstransport).
Sollten dës kräfteg Schaueren an Donnerwieder optrieden, ass et also net ganz ausgeschloss, dass och gréissere Schued kann entstoen. Wéi gesoot, et handelt sech heibäi awer éischter ëmt eng Ausnam! Vum spéideren Donneschdevirmëtten u wäert de Wand net méi warnrelevant sinn.