D’Grousswiederlag
Dës Woch iwwer wäert quasi stänneg héije Loftdrock um Wierk sinn, deen sech vum Atlantik aus iwwert déi brittesch Inselen iwwer Mëtteleuropa bis ganz an den Oste vum Kontinent erstreckt. Duerch d’Stréimungsmuster, wat dobäi entsteet, bleiwen eis déi richteg kal Loftmassen erspuert – se gi méi iwwert den Oste vum Kontinent ëmgeleet an erwëschen esouguer Deeler vum Balkan & dem Oste vum Mëttelmierraum.
Vun den Temperaturen ofgesinn stellt sech eng immens roueg Wiederlag an, déi och esou richteg frëndlech ka ginn. Dat eenzegt wat dofir néideg ass ass, dass sech de Niwwel an de Fréistonnen opléist. Meeschtens steet dann engem frëndlechen Dag mat vill Sonn net méi vill am Wee.
De Verlaf
De Méinde gëtt nach en Iwwergangsdag. Et sinn ëmmer nach e puer Niwwel- a Wollekefelder ënnerwee, d’Sonn kënnt sech awer weisen. Reen steet kee méi um Programm, d’Temperature klamme vun tëscht -3 a 0 Grad an de Fréistonnen op 3 bis 5 Grad am Nomëtten. En Dënschden trëtt dann d’Ännerung an, dass sech d’Wolleke net méi esou vill weisen an d’Sonn um laangen Hiewel ass, esoubal sech de Niwwel opgeléist huet. Klappt alles no Plang, da gëtt den Dënschden en immens frëndlechen Dag bei Maximaltemperature vun tëscht 3 a 5 Grad. Och de Mëttwoch soll dann en änlechen Dag ginn, och temperaturméisseg bleiwe mir um selwechte Niveau ënnerwee. Tëscht 3 a 5 Grad stinn un.