Haut um Méinde starte mir direkt schonn mol mam wäermsten Dag vun der Woch. Am Laf vum Nomëtten ass mat Maximaltemperature vun tëscht 19 an 23 Grad ze rechnen. Ier et awer esouwäit ass, musse mir an de fréie Moiesstonne mol nach drop waarden, dass sech déi méiglech Niwwelfelder opléisen. Ass dat gepackt, erwaart eis e Mix aus Sonn a Wolleken. D’Wolleke ginn a Richtung Owend ëmmer méi déck, ier dann e Reegebitt aus Westen eragezu kënnt. Den Dënschde geet et mol nach mat Iwwerreschter dovun an den Dag eran, ier am Nomëtte Maximaltemperature vun tëscht 16 an 20 Grad erreecht ginn. D’Schauerwarscheinlechkeet geet ëmmer méi wäit zréck, d’Sonn kënnt sech tëscht de Wolleke weisen. De Mëttwoch erwaart eis bei 14 bis 18 Grad e frëndlechen Dag soubal de Niwwel fort ass, Sonn a Wolleke wiessle sech of.
An der zweeter Wochenhallschent beweegt sech aus Weste méiglecherweis erëm déiwe Loftdrock an eis Géigenden, duerch deen et a Richtung Weekend erëm méi wollekeg an och méi naass ka ginn. Fir den Donneschde selwer sinn aus aktueller Siicht gesinn Schauere méiglech, dat bei 16 bis 18 Grad. De Freiden hätte mir et dann mat engem änlechen Dag ze dinn, dat bei 16 bis 20 Grad. De Samsden an och de Sonnde kéinten dann erëm e bësse méi dréche verlafen, dat bei 14 bis 18 Grad maximal de Samsden a 15 bis 19 Grad um Sonnden.
