D’Grousswiederlag
Ier iergendeppes ëmschléit, erwaart eis an de nächsten Deeg mol nach richteg frëndlecht Wieder an och d’Temperature sinn um klammen. Dëst hu mir engem Déif ze verdanken, wat sech a Richtung Portugal verlagert, iwwerdeems iwwert dem Südoste vun eisem Kontinent héije Loftdrock läit.
D’Wäerter klammen doduerch op e fréijoersméissege Niveau. Vun en Donneschden u kënnt eis d’Déif en Tick méi no, et gëtt op d’mannst méi wollekeg. Vun e Freiden u si méi variabel Zenarie méiglech, duerch déi d’Temperaturen awer fir den Ufank nach weider klammen. Deemno wéi sinn erëm bis zu 20°C dobäi.
De Verlaf
Haut um Méinden zéie mol nach e puer Wollekefelder duerch, déi sech vum spéidere Nomëtten un awer verzéien. Ier se ënnergeet, ka sech d’Sonn nach weise kommen. Momentan leien d’Temperaturen tëscht 4 an 8 Grad – un eiser Statioun zu Baschelt sinn et 6,8°C, um Hareler Poteau 5,1°C. An der nächster Nuecht ass den Himmel kloer bis liicht wollekeg, eenzel Niwwelfelder si méiglech. D’Temperature ginn an de Fraschtberäich zréck, bis ëm -4°C si méiglech. Muer um Dënschden an och e Mëttwoch verlagert sech d’Héichdrockgebitt weider a Richtung Südosteuropa, et gëtt richteg sonneg bei eis. Soubal sech de Niwwel opgeléist huet, klammen och eis Temperaturen op e Maximum vun 8 bis 12°C um Dënschden an 12 bis 15°C um Mëttwoch.
An da kënnt den Donneschden, un dem et schonn zu e puer vereenzelte Wolleke ka kommen. Vill soll sech nach net änneren, d’Temperature klammen awer virun. 14 bis 16 Grad sinn dran. E Freide ginn d^Wolleke méi kompakt, besonnesch a Richtung Owend kënnen eis méiglecherweis e puer Nidderschléi aus Frankräich erreechen. Un der Musel si bis zu 20°C net ausgeschloss. E Samschden hu mir änlech Viraussetzungen, et gëtt just manner waarm. Un den zwee Deeg besteet e minimale Risk vun eenzelnen Donnerwieder. Och um Sonnden gesäit et dono aus, wéi wann d’Déifdrockaktivitéit géif dominéieren.