Grousswiederlag
De variable Wiedercharakter aus de leschte Wochen, oder besser gesot d’Grousswiederlag déi dat erméiglecht huet, huet eis verlooss. Mir louche meeschtens ënnert enger westlecher Stréimung. Heiansdo war et méi nordwestlech, wouduerch et zu méi wanterlechem Wieder koum. Aner Kéier war et déi méi südwestlech, wat erëm fir eng méi waarm Phas gesuergt huet. Elo ass awer e Changement agetraff.
Héije Loftdrock läit iwwer Mëtteleuropa, iwwerdeems westlech an ëstlech dovun déiwe Loftdrock läit. Dëst bedeit, dass den héije Loftdrock méi oder manner iwwert eis agekesselt ass. E kënnt also net wierklech gutt vu Plaz wat bedeit, dass dës Phas elo méi laang unhale kann.
Wéi et am Wanter awer esou oft bei héijem Loftdrock ass, bedeit dëst net onbedingt, dass eis schéin Deeg mat vill Sonn ustinn – am Géigendeel: duerch de nidderëge Sonnestand ëm dës Joreszäit feelt et oft u Potenzial, fir d’Temperaturen héich genuch ze drécken, fir dass sech de Niwwel ouni weider Problemer opléise kann. Och d’Wiedermodeller kënnen dës Situatioune nëmme schwéier aschätzen. Tëscht engem frëndlechen Dag mat vill Sonn an engem onfrëndleche groen Dag läit also oft nëmmen e schmuele Grat. Méi iwwert dëse sougenannte Niwwel-Lotto fannt Dir hei.
