Griicheland & Tierkei: Zolitte Wanterabroch mat bis zu 70 cm Schnéi suergt fir Chaos

A Griicheland geet esou gutt wéi guer näischt méi, op mannst mol ronderëmt d’Haaptstad Athen. Um Fluchhafe goufen de Moien 30 cm Schnéi gemooss, zu Tatoi sinn et 40 cm an zu Kasteli op Kreta sinn et esouguer 71 cm. All Zort vu Verkéier ass gréisstendeels zum Stëllstand komm, egal op Fluch-, Zuch-, oder Autostrafic. Et huet esouguer sou staark a vill geschneit, dass dausende Leit zu Athen op enger Autobunn hänke bliwwe sinn.

Greece sinks into snow chaos. Trains and cars are stuck. The military distributes blankets and food. pic.twitter.com/xDgnnLudiO

— 🅰🅻🅴🆁🆃 🅲🅷🅰🅽🅽🅴🅻 (@AlertChannel) January 25, 2022

Dës 1200 Autoen, sou de griichesche Medie no, kruten Ënnerstëtzung vum Militär. 3500 Persoune sinn bis de fréien Dënschdemoien evakuéiert ginn. Wéi d’Police matdeelt, wieren am Zentrum vun der Haaptstad esouguer Schnéikette néideg, well ee soss net wäit kéim. Ee Parameter, deen zu dem ganze Schnéichaos bäidréit, ass, dass et a Griicheland keng Flicht fir Wanterpneue gëtt – a Griicheland an haaptsächlech zu Athen schneit et zwar puer mol am Wanter (däitlech manner oft wéi bei eis), mee ni vill an et bleift och esou gutt wéi ni eppes leien.

Duerch dat enormt Gewiicht duerch d’Schnéicouche sinn och an anere Landesdeeler Stroumleitunge kollabéiert.

De sougenannte Lake-Effekt spillt eng entscheedend Roll bei all deem, wat sech dohannen ofspillt. Iwwert dem ëstleche Mëttelmier läit nämlech en Déifdrockgebitt, wat äiseg Loftmassen aus Russland a Richtung Süden a Südwesten dréckt. Dës Loftmasse zéien iwwert dat schwaarzt Mier ewech, wat e gutt Stéck méi waarm ass wéi déi ëmleiend Loft. Déi waarm Loft steigt an den Himmel an trëfft op déi kill, et entstinn Wolleken. Dës fiicht Loftmassen treffen iergendwann u Land a ginn doduerch gezwongen, sech ze hiewen. Et fänkt u mat schneien, zumools an den Héichlagen och méi kräfteg.