Kanada: British Columbia mellt héchst Dezembertemperatur zanter Opzeechnungsufank

Freitag, 3 Dezember 2021, 6:10 meteoboulaide Ausland, News Kommentare deaktiviert für Kanada: British Columbia mellt héchst Dezembertemperatur zanter Opzeechnungsufank

Am Weste vu Kanada, an der Provënz British Columbia, konnt een de Mëttwoch déi déck Jackett zréck an de Schaf hänken. Et war de wäermsten Dezember-Dag zanter Opzeechnungsufank.

Titelbild Foto: Thierry Goose via Twitter

Neie Rekord fir d’Provënz

Zu Penticton, an der Provenz British Columbia am Weste vu Kanada, ass den 1. Dezember 2021 de wäermsten Dezemberdag an der Provënz zanter Opzeechnungsufank observéiert ginn. Den Thermometer huet 22,5 Grad ugewisen, wat och gläichzäiteg dem nationale méintlechen Temperaturrekord vun 22,5 Grad, gemooss am Dezember 1982 zu Hamilton am Ontario, entsprécht.


De Mëttwoch, 1. Dezember 2021, louchen d’Temperaturen an der Provënz British Columbia bei tëscht 20 bis 35 Grad iwwert der Temperaturmoyenne | Grafik: WeatherBELL

Penticton läit e puer honnert Kilometer südëstlech vu Lytton, wou am Summer e neie kanadeschen Hëtztrekord vu 49,6 Grad opgestallt gouf. Duerno ass et an der Regioun zu Bëschbränn komm, wat op mannst zwee Awunner d’Liewe kascht huet.