Entwécklung vum Stuerm kënnt nëmme schläifend virun
Nach zitt sech d’Entwécklung vum Tropestuerm e bëssen an d’Längt – d’Interaktioun mat der onmëttelbarer Landfläch vum äusserste Norde vu Venezuela (do wou de potenziellen Tropestuerm de Moment läit) bremst dat Ganzt e bëssen. An awer gëtt domat gerechent, dass de Stuerm all Moment zu engem tropesche Wirbelstuerm gëtt. Dësen Artikel ass an der Nuecht op de Freide geschriwwen, eventuell kann et also schonn esouwäit sinn.
Intensivéierung zu engem Hurrikan erwaart, massive Reen méiglech
Nodeems d’Ufäng vum Tropestuerm iwwert de Golf vu Venezuela an dann och nach nërdlech vu Riohacha, Kolumbien ewechgezunn ass, geet et mam Stuerm op dat waarmt karibescht Mier eraus. Hei distanzéiert sech de System méi wäit vun alle Landflächen a ka sech esou ouni gréisser Stéierunge weider verstäerken. Fir de Sonndemoie gëtt domat gerechent, dass aus dem Tropestuerm dann en Hurrikan vun der éischter Kategorie op der Saffir Simpson-Skala gëtt. Nach virum Sonndenowend erwaart de National Hurricane Center, dass den Hurrikan knapp nërdlech vu Pearl Lagoon, Nicaragua u Land goe wäert. An der Moyenne solle Wandvitesse bis 140 km/h generéiert ginn, an de Spëtzten däitlech driwwer. Wat de Reen betrëfft, sinn haaptsächlech do wou de Stuerm u Land geet de Modeller no bis ëm 400 l/m² Reen méiglech.
