D’Situatioun bis e Mëttwoch
Dem amerikaneschen an dem europäesche Wiedermodell no hält sech de momentanen Héichdrockafloss wuel nach bis de nächste Mëttwoch, ier dann awer e bësse méi Schwong kéint erakommen. Bis et esouwäit ass geet et awer mol nach mat engem Mix aus Sonn, méi décke Wolleken an och zäitweis méi zéie Niwwelfelder virun, iwwerdeems d’Temperaturen ëmmer nach an engem iwwerduerchschnëttleche Beräich ënnerwee sinn.
Duerno Kalfront méiglech, déi alles ännere kéint
Vun den zwee Modeller gëtt dem momentane Stand no dann eng Kalfront gerechent, déi an der Nuecht op den Donneschde soll duerchzéien. Dës Kalfront kéint den Héichdrock-Konstrukt wéi en elo ass lues a lues aus senger Form bréngen. Zwar géif et probéiere, seng Positioun ze halen, an awer kéinte vum Atlantik awer ëmmer erëm Déifdrockgebitter mat hire Fronten iwwergräifen. Alles an allem ergëtt sech esou, aus momentanem Stand gesinn, e variabelt Wiederbild fir déi zweet Hallschent vun der nächster Woch.
Variabel wieren dann och eis Temperaturen: E Mëttwoch géifen nach eng Kéier Wäerter vun tëscht 21 a 25 Grad optrieden (amerikaneschen an europäesche Modell si sech eenz), ier et den Donneschden just nach 14 bis 17 Grad waarm géif ginn. Fir de Rescht vun der Woch wieren dann just nach ëm 19 Grad als Maximum um Programm – mat Ausnam vum europäesche Modell, deen fir de Freiden mat Wäerter bis 25 Grad op e Neits eng nennenswäert Temperaturschwankung gesäit.
Egal wéi genee sech d’Temperature wäerten entwéckelen: Fir déi zweet Hallschent vun der nächster Woch deit villes de Moment en Ëmschwong op eng méi variabel Wiederlag un, duerch déi natierlech och d’Warscheinlechkeet vu méi fréquente Nidderschléi géif an d’Luucht goen.