D’Entwécklung vun der Grousswiederlag
Wéi mir an de leschten Deeg jo op e Neits gemierkt hunn, kann ee Grousswiederlagen deemno wéi zwar schonn eng méi laang Zäit am Viraus aschätzen, d’Eenzelheeten awer net. A mam erweiderte Bléck an d’Mëttelfrist gesäit ee ganz gutt, dass d’Wiedermodeller schonn fir e Sonnden erëm mat engem markanten Ustieg vun eisen Temperature rechnen. Aktuellem Stand no wiere Maximaltemperature vun tëscht 9 a 15 Grad net ausgeschloss. Sollt sech bis dohin iergendwou tatsächlech e bëssen eppes u Schnéi gewisen hunn, dann ass dëse séier erëm “Schnéi vu gëschter”.
E Samschde beweegt sech e staarkt Stuermdéif vum Atlantik hier a Richtung brittesch Inselen. Den Aflossberäich vun dësem Déif ass esou grouss, dass mir heiheem ënnert déi waarm viicht Säit dovun (Vorderseite) geroden, déi eis ebe mëll a fiicht Loftmassen aus den Déifte vu Südwesteuropa liwwert. Richteg spierbar gëtt dat e Sonnden an och nach an der Nuecht op e Méinden, ier eis de Virstouss u waarme Loftmasse lues awer sécher a Richtung Südoste verléisst. Kuerzzäiteg kann eis dann erëm kill Loft aus dem héije Norde vun Europa erreechen – et schéngt awer allerdéngs ze vill Beweegung an der Atmosphär ze ginn. Alles an allem gesäit et an Zukunft no engem variabele Verlaf aus. E richtegen a nohaltege Wanterabroch ass net a Siicht.