No naassem Mëttwoch: Weider nennenswäert Quantitéite fir muer a Siicht

Den Dag vun haut fällt esou lues richteg an d’Waasser – a leider war et dat nach net. Den Dag vu muer gëtt en änlechen. Et heescht opzepassen wéinst Aquaplaning.

Bis an de Virmëtten eran huet et op ville Plaze nach e bësse méi intensiv geschott, ier sech de Reen dunn e en Tick ofgeschwächt huet – komplett dréche bliwwen ass et awer net an eisem Land. Elo, zum Zäitpunkt wou dësen Artikel geschriwwe gëtt (07.02.2024 – 12:45 Auer), kënnt op e Neits méi markante Reen aus der Belsch an eist Land eragezunn.

Dëse begleet eis duerch de Nomëtten a viraussiichtlech och nach bis an de spéideren Owend eran.

Kënnt nach vill Reen no?

Déi, déi elo schonn genuch vun dëser naasser Phas hunn, mussen deemnächst weider op d’Zänn bäissen: Och an de nächsten Deeg bleift et net dréchen, virun allem den Dag vu muer bréngt nach eng Kéier gréisser Zomme Reen op Lëtzebuerg. Verbreet ass nach eng Kéier mat 8 bis 15 l/m² ze rechnen. Zumools laanscht de Weste besteet op e Neits d’Tendenz, dass et am meeschte reent. Berechent ginn Zomme vun 20 l/m², je no Modell kënnen och bis zu 25 l/m² optrieden.

Och e Freide reent et nach: Um fréie Moien handelt et sech nach ëm flächendeckende Reen, mee schonn vum Virmëtten u sollt dat Ganzt ëmmer méi a Schauerwieder iwwergoen. Vum Nomëtten u ka sech dann dotëscht och mol heiansdo d’Sonn kuerz blécke loossen. Och de Weekend soll et nach zäitweis naass ginn, mee net méi esou flächendeckend wéi haut a muer.