“Onvirstellbar Zeenen”: Update zu de katastrophalen Onwieder a Spuenien

Mittwoch, 30 Oktober 2024, 11:28 Philippe Ernzer Ausland, Aussiichten, News, Spotlight Kommentare deaktiviert für “Onvirstellbar Zeenen”: Update zu de katastrophalen Onwieder a Spuenien

Elo an der Vakanzenzäit si vill Lëtzebuerger a Spuenien ënnerwee, dohier hei e weideren Update. Besonnesch am Norde vun der Valenzianescher Gemeinschaft, Katalounien an dem Weste vun Andalusien heescht et weiderhin opzepassen.

Advertisement

Schro Biller aus de betraffene Géigenden

Zumools de südlechen Deeler vun Andalusien, südwestlech vu Madrid a besonnesch knapp westlech vu Valencia huet et an de leschten dräi Deeg immens vill gereent – gëschter koum op ville Plaze nach e massive Stouss u Reen dobäi. Akkumuléiert gekuckt sinn zumools an der Valenzianescher Gemeinschaft tëscht 300 a 400 l/m² Reen erofkomm – deels ass och e gudden Deel dovun an Zäit vu just e puer Stonne gefall.


Déi akkumuléiert Reequantitéiten tëscht dem Sonnden a gëschter | Grafik via @Met4CastUK op X / ClimateBook

Dass dat a groussen a katastrophalen Iwwerschwemmunge resultéiert, war leider ofzegesinn. Nieft dem extreeme Reen konnt bis ewell och op d’mannst een Tornado confirméiert ginn, deen un enger Superzell entstanen ass. Wéi d’Medie mellen, si bis ewell méi wéi 50 Mënschen duerch dës Onwieder gestuerwen. D’Situatioun gëtt als “nach ni dogewiescht” an “onvirstellbar” beschriwwen.

Wéi et elo virugeet

Fir verschidde Géigende kann een Entwarnung ginn, fir anerer awer nach net grad. Do, wou et méi roueg wäert virugoen, ass d’Regioun déi sech vu Murcia bis erop op Madrid zitt. Bis e Sonnde ginn hei just nach niddereg Reequantitéite berechent, punktuell kann et och quasi dréche bleiwen.


Déi akkumuléiert Reenzommen bis de Sonnden inclus | Grafik: wxcharts.com

Oppasse muss ee weiderhin am Südweste vun Andalusien, fir Sevilla an d’Ëmgéigend stinn de Modeller no nach eng Kéier tëscht 50 an 130 l/m² Reen un. Nach méi grouss Zomme gi fir Katalounien an d’Grenz zu der Valenzianescher Gemeinschaft berechent: Am Raum La Ràpita, Riumar a Campredó kann nach eng Kéier bis zu 200 l/m² reenen – deemno wéi méi. Onsécher ass, ob sech de Gros vun dësem Reen u Land ofspillt oder iwwert dem Mier. Aner Modellrechnunge gesinn och nach eng Kéier e Korridor mat vill Reen, deen sech bis un d’Küst vu Valencia soll ausbreeden. Och am Raum Barcelona gëtt et richteg naass, extreem Zomme sollten do awer net optrieden. Wat Lloret de Mar ugeet, ginn et just eenzel Modellrechnungen, déi Zomme vun oder ëm 60 l/m² gesinn.

Uginn si jeeweils d’Reenzommen, déi bis e Sonnden inclus kënnen erofkommen. Am Südweste vun Andalusien kënnt haut a muer dat meescht erof, deels och un der Valenzianescher Grenz zu Katalounien. Däitlech méi soll et do awer vum Freidemoie bis e Sonndenowend reenen.