D’Modeller GFS an ECMWF sinn an Tëschenzäit an och dem aktuelle Stand no endlech op dem änlechen Trip, dass se vum 1. bis den 3. Dezember zimmlech rouegt Wieder bei eis berechnen. Et wier zwar e bësse méi kal wéi de Moment, mee generell wier et ebe roueg an och u Nidderschléi géif net vill erofkommen. Sou wäit, esou gutt – mee hei fänken d’Differenzen erëm un.
De neiste Modell-Laf vum amerikanesche GFS rechent fir den Owend um 3. Dezember eng Kalfront, ausgeléist vun engem klengen Déif wat iwwert der Nordséi leie soll. Op der Récksäit vun dësem Déif kéint et an der Nuecht op de Sonnden, 4. Dezember net ausgeschloss ginn, dass et mol schneit. Den europäesche Modell ECMWF ka net esou wäit kucke, mee grad emol bis de Sonndemoie fréi, 4. Dezember 2022 – et gëtt keen Déif nërdlech vun eis berechent, mee méi iwwert den Alpen.
Mee kommt, mir ignoréieren einfach mol den allgemeng berechente Wiederzoustand. Wann ee no Wanterwieder sicht, da kënnt et an éischter Linn op d’Loftmassentemperatur un – an dës kéint an den Deeg drop uerdentlech an de Keller goen.
Keelt aus Russland
Ensemblerechnungen vum ECMWF an och GFS weisen allen zwee en däitlechen Ofwäertstrend bis den 12. Dezember wat eis Temperature betrëfft. Kee Wonner: e Bléck op d’Kaarte weist eis e risege Block un héijem Loftdrock, deen eis bis dohin richteg kill Loftmassen aus Russland op Mëtteleuropa brénge kéint – en Zenario, deen ëmmer méi oft esou berechent gëtt. D’Situatioun fänkt also a klenge Schrëtt un, eng gewëss Relevanz ze kréien. Et kann ee wuel nach net soe wéi kal et gëtt, mee den Trend weist säitens den zwee Modeller mol däitlech no ënnen. Ech kann awer, Stand aktuell, net ausschléissen, dass mir et iergendwann vun tëscht dem Ufank vum Dezember bis den 12. Dezember dorëmmer Maximaltemperature vu nëmme nach ëm 3 Grad am Dag kéinte gesinn, iwwerdeems mir an de Nuechten drënner leien.
