Ostwand-Update: Muer um Mëttwoch nach e Stéck méi kräfteg

Wéi ugekënnegt, ass de Wand haut schonn immens spierbar – punktuell goufe bis ewell bis zu 60 km/h gemooss. Fir muer gi nach méi stramm Vitesse berechent.

Dës Vitesse si fir Lëtzebuerg näischt aussergewéinleches an engem Stuerm entsprécht dat och nach net. Wat awer ongewéinlech ass, ass d’Wandrichtung: Bei lëftege Wiederlagen hu mir et nämlech meeschtens mat enger südwestlecher oder westlecher Stréimung ze dinn, an dësem Fall kënnt en awer stramm aus Osten. De Grond dofir ass e grousst Héichdrockgebitt, wat sech iwwert der Nordséi ophält. Zur selwechter Zäit läit e kräftegt Déif iwwert dem ëstleche Mëttelmierraum, e weidert méi klengt läit iwwer Osteuropa. Duerch déi grouss Loftdrockënnerscheeder kënnt et tëscht dem Héich- an Déifdrockafloss zu enger sougenannter “Isobarendrängung” – d’Natur probéiert, de Loftdrock auszegläichen. D’Konsequenz dovun ass ebe stramme Wand, an dësem Fall aus der ongewéinlecher ëstlecher Richtung.

Op eist eegent Netz bezunn gouf déi bis ewell héchst Wandvitesse um Hareler Poteau gemooss, dat mat 60,15 km/h um 14:30 Auer. Elo frësch erakomm ass e neien Héchstwäert fir d’Statioun vun der Nordstrooss Shopping Mile Marnach mat 54,7 km/h, d’Wiederstatioun vum SNJ zu Huelmes mat 49,9 km/h, de Lycée Technique d’Ettelbruck mat 46,7 km/h an de Lycée Robert Schuman mat 45,1 km/h.

De Mëttwoch gëtt nach en Tick méi stiermesch

D’Wiedermodeller bleiwen dobäi, dass de Mëttwoch e nach méi lëftegen Dag gëtt. An de Spëtzte kënne Vitesse vun tëscht 60 a 75 km/h dobäi sinn, zumools op exponéierte Plazen. Well 75 km/h un eiser Warnschwell krazt, kéint muer am Laf vum Dag e Wiederhiweis (keng Warnung) an eisem SkyWatch aktivéiert ginn. De Grond si lasse Géigestänn, déi kënne fortfléien – esouwéi awer och Beem an Äscht, déi kënnen an d’Stroosse falen. Dat war haut bis elo schonn e puer mol de Fall, esou d’Meldunge vun RTL.