Wéi et an de nächste Stonnen den aktuelle Modeller no viru geet
Zanter dem Update vun de Moie fréi hu sech nach e puer Détailer zu der Situatioun vun haut den Owend erauskristalliséiert. Déi nächst Zeile beschreiwen en Zenario, dee méi oder manner esou vun de meeschte Wiedermodeller berechent gëtt:
Et ass domat ze rechnen, dass d’Waarmfront, déi eis de Glëtz brénge soll, géint 18:45 / 19:00 Auer bei eis ukomme soll. D’Temperature leien de Moment tëscht 0 an 2 Grad uechter d’Land, de Buedem ass schonn gefruer. Mam ukomme vun der Waarmfront wäert et also héchstwarscheinlech reenen. Dëse Reen trëfft op de gefruerene Buedem a ka sech do an och op Géigestänn festsetzen. Ier d’Front hei ass, verginn nach bal 2 Stonnen. Bis dohi kënnen d’Temperaturen am Allgemenge nach e bësse fale, soudass de Risk dovu weider klëmmt. Et ass net auszeschléissen also, dass et bis 23 Auer, wann d’Ausgangsspär ugeet, deels geféierlech Konditiounen duerch spigelglat Stroosse besteet. Bis ëm 01 Auer ass de Risk vu Glëtz erhéicht, géint 22/23 Auer klëmmt d’Warscheinlechkeet vun eenzelne Schnéischaueren op den héchste Koppe vum Land. D’Temperaturen hale sech bis 02 Auer tëscht -1 an 2 Grad op a schwanken vun Zäit zu Zäit. Vun 03 Auer un sollen d’Wäerter definitiv no a no klamme, soudass de Risk vu wanterlechem Wieder, haaptsächlech op de Stroossen, a Richtung fréien Dënschdemoien zréckgeet. Dëst bedeit, dass et mat Chance um Dënschdemoie keng gréisser Problemer am Beruffsverkéier ka ginn. Berechnunge no leien d’Temperaturen dann bei 4 Grad am Nordwesten a nach bei 1 Grad am Südoste vum Land. Och am Südoste gëtt et no a no méi waarm.
Fazit
De Glëtz kann am ganze Land falen. D’Fro déi sech stellt ass just, wéi flächeg dat wäert de Fall sinn, wat ee leider net ofschätze kann. Wat de Schnéi ugeet muss ee soen, dass d’Warscheinlechkeet dovun um spéideren Owend e bëssen an d’Luucht geet, haaptsächlech op de Koppe kann et do mol zu e puer Flacke kommen. Soss komme mir meeschtens mat Schnéireen oder Reen (oder dee Moment ebe Glëtz) aus der Saach eraus. E richtege Wanterabroch sollt dëst nach net sinn, mee éischter an Intermezzo.